vnd die / so von den Genealogiis, Stämmen / Bäumen / vnnd Geschlecht-Registern / geschrieben haben: Jtem: Gebhardum Johan. Vossium, in Comment. de rebus pace belloq; gestis Fabiani Senioris, Burggravii à Dhona, pag. 30. (der sie von den allerältisten Hertzogen in Schwaben herführen solle / den man aber zu diesem mal / zu sehen / vnd zu lesen / nicht bekommen können) Besoldum part. 6. Consil. 258. vnd Crusium, hin vnd wider in seiner Schwäbischen Chronick.
Am Schwartzwald / im Kintzgerthal / am Fluß Schiltach / nahendt dem Stättlein Wolffach vnnd Haßlach gelegen / welches Stättlein / vnd Schloß / mit Dörffern vnnd Zugehör / Anno 1389. Hertzog Reinold von Vrßlingen / dem Graff Eberharden von Würtenberg / vmb sechstausendt Rheinischer Gülden zu kauffen[1] geben: Daher dieser Orth noch Würtembergisch ist. Anno 1533. den zehenden Aprilis / ist er innerhalb einer Stundt gantz abgebronnen / als ein Weib vom Teuffel zu oberst deß Camins / oder Rauchfangs geführt worden / vnnd jhren Hafen / oder Topff / auff seinen Befelch / vmbgekehret hatte; die man hernach verbrandt hat. Also ist dieses Stättlein / so fünff vnnd dreyssig Häuser hatte / Anno ein tausendt fünffhundert vnd neuntzig wieder / biß auff die Kirche / vnd deß Predigers Hauß / gantz abgebronnen. Crusius in Annal. Suevic.
Dieses Marggräfisch Badisch Stättlein / ligt in der Herrschaft Röteln / vnnd im Wiesenthal; bey Basel an dem Fluß Wiesen. Es seyn auch zwey / als Ober- vnnd Nieder-Schopffen / in der Mordnaw / bey Lohr / vnnd Schuttern / so aber nur zwey Dörfflein.
Im Hertzogthumb Würtenberg / zwo Meilen von Gmünd / Backnang / Weiblingen / Murrhart / Canstatt / Marbach / Göppingen / Wendlingen / Eßlingen / Ow / vnnd Kirchheim vnter Teck / drey von Stutgart / Gaildorff / Wiesenstaig vnd Nirtingen / vnd ein grosse Meil von Wineda / in dem Remsthal / so allhie am breytesten / zwischen Gmünd vnd Weiblingen / gelegen. Solle vor dem Jar Christi 1190. fast nur noch ein Meyerhof gewesen seyn / in welchem ein Bawersmann gewohnet / der den Boden / oder die Gärten / mit einer Schauffel / darauf man mit dem Fuß tritt / vnd welche Gattung im Land ins gemein Schorn genant wird / vmbgraben / vnnd solches Jnstrument selber gemacht haben solle / daher der Namen / vnnd zu solchem Meyer- oder Schornhoff / hernach mehr Häuser kommen / daß ein Dorff darauß worden ist / so endlich zu einer / zwar nit sonders grossen / Statt erwachsen. Welcher Käyser Fridericus II. vmbs Jahr 1230. das Stattrecht ertheilet / vnnd zwo Grabschauffeln zum Wappen geben / darzu die Grafen von Würtenberg folgends ein schwartzes Horn gethan; vnd sie mit der Zeit Keyser Carolus IV. belägert; die auch / zun Zeiten Keysers Caroli V. ein Spanische Besatzung hat eynnehmen müssen. Hertzog Vlrich von Würtenberg hat sie zubefestigen angefangen / welche seine Nachfolger nach / vnnd nach / mehrers fortificirt haben; also daß Crusius, zu seiner Zeit / vermeynt gehabt / weiln der Wall herumb hundert Schuh breyt / vnnd die Graben gar tieff; die Statt in der Ebne gelegen / vnd das Geschütz / wegen der Berge herumb / damit sie etlicher massen vmbgeben / jhr nicht schaden solte / dz ehe ein Königreichs Vermögen darauf gehen / als dz diser Ort erobert werden solte. Aber es ist derselbe / so nach Stutgart / Tübingen / vnd Aurach / die Vierte vnter den fürnembsten Stätten deß Hertzogthumbs / Anno 1643. den 23. Novembris / durch Granatenwerffen bald erobert / vnnd biß auffs Schloß / vnnd etwan zwey / oder drey Häuser / in die Aschen / von den Keyserischen / gelegt worden / wiewol man
- ↑ Vorlage: kauffeu
Matthäus Merian: Topographia Sueviae. Frankfurt am Mayn: Frankfurter Kunstverein, 1643/1656 (Faksimilenachdruck 1925), Seite 170. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_223.jpg&oldid=- (Version vom 31.7.2018)
