|
Froben Christoph von Zimmern: Zimmerische Chronik. Band I. Herausgegeben von Karl August Barack. |
|
|
aufgehört, sie verharrat. Aber unlangs, als er wider mit allem gesindt geen Messkirch zogen, hat er auf ain abendt etliche kinder auf dem kirchhof [231] bei Sant Martin laufen und bei denen dodtengrebern wandlen sehen, welches in
zu verdruß bewegt, derhalben in ainer undult auf den kirchhof gangen, die kinder mit rauhen worten ab den grebern zu treiben. In solchem hat in ain unversehene, geschwinde forcht und schrecken umbgeben, und als er wider in sein gemach kommen, ist im gleich so whe worden, das er
dödtlichen krank sein und pestem haben wol befunden; derhalben im federn, dimpten und bapeir haißen bringen und dise nachvolgenden puncten seinem son, herrn Johanns Wörnhern, zue ainer ler und underrichtung geschriben hat: »Du und sie solt Got vor augen hon und in erkennen
vor allen dingen. Item du solt unser Frawen und alle engel und liebe hailigen eeren und lieb hon. [A179a] Item du solt die gepot Gottes halten und schaffen mit allen denen, über die du zu gepieten hast, das sie[1] von inen auch gehalten werden. Item du solt den gotsdienst offnen und nit
lassen abgeen. Item du solt nit schweren und gepieten allen denen, über die du zu gepieten hast, das sie es auch nit thueen bei zimlichen peenen. Item du und sie sollen die pannen täg feiren und fasten. Item du solt alle gepannen täg ain gesungen ampt und vesper und predig hören.
Item du solt sonst alle andere tag zum wenigisten ain gesprochne mess hören. Item das sie alle tag ampt und vesper höre. Item daz sie baide gotzzierden und die seelen inen lassen empfolhen sein. Item du solt deine freundt für deine freundt erkennen und nichts groß on iren rat handlen.
Item du solt deine nachpurn nit verachten, sonder sie in hulden halten und umb ains clainen nit verlieren. Item das du dir deine armen leut, gaistlich und weltlich, lassest empfalhen sein und inen nit unrecht thun, und das sie ainandern auch nit unrecht thueen. Item du solt deine armen
leut liebhon, auch nit schetzen, sonder sie bei iren steuren und diensten lassen beliben, auch tugentlich mit inen reden und leben. Item du solt dich hüeten vor dem krieg, man sicht im das haupt wol, aber nit die füeß. Item du solt dich hüeten vor dem kampf und vor worten, die dich
darzue raizen, dann es ist süeß anzufahen, aber schedlich oder
- ↑ sie] hs. es.
Froben Christoph von Zimmern: Zimmerische Chronik. Band I. Herausgegeben von Karl August Barack. Akademische Verlagsbuchhandlung von J. C. B. Mohr, Freiburg, Tübingen 1881, Seite 463. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Zimmerische_Chronik_1_463.jpg&oldid=- (Version vom 12.4.2018)
