befinden würde / wann vnd wo ers vielleicht am wenigsten gedacht hette.
Don Kichote sagte jhm zu / alle dem jenigen / so er jhm gerathen hette / in jedwederm Puncten stet vnd vnverbrüchlich nachzukommen: vnd wurde hierauff bald zugerüstet vnnd angeordnet / wie er seine Rüstung in eim grossen Hof / so seitwarts der Schencke war / bewahren vnnd beschützen solte. Also nam Don Kichote alle seine Waffen zusammen / vnnd stelte sie auff einen Trog / so nahe bey dem Brunnen stunde: Faßte sich mit siner Rundtartschen / nam zur Hand die Lantze vnd fieng an mit eim zierlichen Geberd vnd Geschicklichkeit des Leibes vor vnnd an dem Troge her zu spatzieren / vnd / gleich in dem er also herein zu tretten anfieng / fieng es auch an gantz nacht zu werden.
Der Wirth erzehlte denen allen / so drinn im Hauß wahren / die Thorheit seines Gasts / die Bewahrnüß seiner Rüstung / vnnd wie er jhn in gantz kurtzem zum Ritter schlagen würde / drauff dann der Gast eintzig vnd sehnlich hoffete. Sie verwunderten sich alle sehr ab der so seltzamen vnd vnerhörten Art der Thorheit / verfügten sich von weitem an den Ort / dem Handel zuzusehen: vnd wurden gewahr / wie der gute Ritter mit gar sittsamen sanfften Geberden bald hin vnd wider gieng / bald vff seine Lantzen sich lehnend / die Augen stracks gegen seine Rüstung kehrete / vnd sie also vnverwendetes Gesichts ein gute weil beschawete. Die Nacht fieng sich an mit so grosser Klarheit des Monds / daß er den Planeten selbs nichts bevor gab / der jhm solchen Schein darliehe: in solcher Maß / daß alles / was der new angehende Ritter that oder fürnahm / von jederman wol mochte gesehen werden.
Inmittels kam den einen Eseltreiber von denen /
Miguel de Cervantes: Erster Theil Der abenthewrlichen Geschichte des scharpffsinnigen Lehns- vnd Rittersassen / Juncker Harnisches auß Fleckenland / Auß dem Spanischen ins Hochteutsche vbersetzt Durch Pahsch Basteln von der Sohle. Frankfurt 1648, Seite 40. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Don_Kichote_de_la_Mantzscha_040.jpg&oldid=- (Version vom 17.8.2016)
