Seite:Duerer Underweysung der Messung 017.jpg

	Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen

Es ist zu^o mercken / das der zirckelrys durch welchen eyn Schneckenlini getzogen wirdet / mit punckten so in vil theil geteilt mag werden / als man will / dann yhe in mehrteyl er geteylt wirdet yhe genewer damit zu^omessen ist / vnd in so vil theyl du die zirkellini teylst / so in vil theyl mustu alweg dein richtscheyt theylen / darauß du die schnecken lini eynfach wilt machen / Wiltu^[1] sie aber zwyfach tryfach / oder vierfach etc. machen / so vilfeltig dein richtscheyt mit den punckten vnd zaln zwyfach tryfach oder vierfach etc. / vnd lauff darnach wider mit herum / so findt sich dein begern / Ob du aber sorgest / so du dein richtscheyt vilfeltigst / vnd im vmlauffen auff dem zirckelryß von der vngleychen zal wegen / die sich begeben vnnd vbereynander lauffen / du mo^echtest darinn jrre werden / so thu^o jm also / So du die zirckellini geteilt hast / jch setz hie in /12/ teyl / so du dann dein schnecken lini / zwyfach / tryfach / oder vierfach wilt lassen herum lauffen / So theyl dein richtscheyt in so vil punckten du wilt / vnnd setz die zyffer darzu^o .1/2/3/etc. byß auff .12. Darnach heb wider an zu^o zellen .1/2/3/etc. byß auff .12. darnach thu^o jm wider also / vnd aber also / Vnnd richt dein richtscheyt mit den zyffern / das die zal alweg zu^e samen stymmen im zirckelryß vnd im richtscheyt / darmit du herum lauffest / so kanstu nit jrre werden / So nun die schnecken lini auff einer rechten ebne getzogen ist / will jch sie nachuolget von vnden vbersich ziehen leren / Es ist zu^o mercken so^e man etwas machen will / soll man jm vor seyn grundt setzen / es sey geba^ew oder anders / Des halb kan man die schnecken lini nit woll vbersich fu^eren / sie sey dann vor im grund auff einer ebne nider gelegt / Darumb reyß erstlich den grund der negst vorgemachten blossen schneckenlini mit sambt jrer zirckellini / darauß sie dann gemacht ist / wie sie dann da vorn stett / Aber alle jre bletter laß aussen / Doch mustu die ziffer bey den punckten in der schnecken lini verkeren das merck also / so du im zirkelryß herum komen byst / von .1. byß auff .12. darnach dritzt du mit den punckten hynein in die schnecken lini / da hebt sich die zal aber an /1/2/3/etc. dem thu aber hie anderst / so du fon dem punckten .12. der zirckellini in den ersten punckten der schnecken lini dritzt da dann vor eins stett / an die selb stat setz 13. also forthyn in der zall byß auff .23. So nun diser grundt vnden auffgeryssen ist / alßdann reyß eyn auffrechte gerade lini auß dem punckten .6. vbersich durch den Centrum .a. vnd durch den punckten .12. so hoch du der bedarffst / Vnd zu^o jrem end setz oben eyn .a. dann der selb punckt .a. stett ob dem Centro .a. Darnach schneyd vnden dise auffrechte lini / a. mit einer zwerch lini .c.d. ab / der ort sey .b. Dise lini .a.b. theil mit .23. punckten / in .24. gleiche felt / Ich will aber hie die felt vbersich in einer ordnung erlengen / wie voren angetzeigt / Darumb nym jch wider den selben weg fur mich / alleyn die zwen bustaben verker jch / das .a. setz jch oben das .b. vnden / des gleichen heb jch mit den zyffern vnden an zu^ozelen vbersich /1/2/3/etc. So nun dise auffrechte lini geteylt mit jren punckten vnd zyffern mitten auff dem grund stet alßdann far jch mit einer auffrechten lini auß dem grundt des punckten .1. vbersich durch die zwerch lini .c.d. Darnach far jch auß der rechten lini .a.b. auß dem punckten .1.^[2] mit einer zwerg lini gegen der auffrechten lini / die auß dem grundt des punckten .1.^[2] vbersich zogen ist / wo dann dise zwu^o lini eyn eck schliessen / da setz jch ein punckten .1. diß ist der erst punckten / der da anfecht in der auffgetzognen schnecken lini / Also thu^oe jch im durch die gantz zal vnd punckten / des nyder getru^ogten grundes vnd der aufftzognen lini .a.b. zu^o beyden seyten / So puncktirt sich die schnecken lini von dem vndersten puncktenn .b. vbersich byß zu^o dem punckten .a. darnach zeu^ech jch die schnecken lini von punckt zu^o punckt / Item so durch dise lini eyn schnecken styeg / in ein du^orn dach gemacht wirdet / so soll die vnderst staffel vil lenger seyn dann die oberst Vnd also hinauff nach ordnung ab geteilt werden / vnd ye mehr in spitzen / ye mehr so^ellen nach obgemelten dingen die staffeln ho^eher werden / wie jch das hienach erstlich den grund des schnecken / vnnd darob den schnecken auffgetzogen / mit allen no^ettigen gestrackten linien / Vnd darnach die schnecken lini auch gantz ledig hab auff geryssen / Dise schnecken lini mag man eng vbereynander zyhen / oder ro^esch in die ho^ech streychen lassen / darnach man die lini .a.b. kurtz oder lang macht / Dise lini ist zu^ouil andern dingen nu^etz / Auch hab jch den dryangel .a.b.c. darauß jch die lini .a.b. in jren teylen oben erlengt hab / durch den zirckelryß .a.e. mit aller zu^ogeho^erung hernach auffgeryssenn / Item die obgemeltenn schnecken linien / mu^egen auch ecket getzogen werden so man allweg ein punckten oder zal zwisschen zweyen aussen lest / merck in dem auff zognen schnecken / so du zeu^echst auß dem punckten .b. byß auff .2. ein gestrackte lini / von zweyen auff .4. von .4. auff .6. etc. Also forthin durch auß biß zu^o dem end /a.

Anmerkungen (Wikisource)

1. Vorlage: Wiltn
2. Vorlage: .i.

Empfohlene Zitierweise:
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 17. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_017.jpg&oldid=- (Version vom 31.7.2018)