Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen | |
|
Item auff eyn andre weiß will jch eyn schnecken lini machen mit dem zirckel also / Erstlich setz eyn Centrum .a. darauß mach ein zirckelryß / vnd teyl jn wie vor mit 12 / punckten[1] in 12 gleiche felt / vnd reiß von allen punckten in Centrum .a. gerad linien / vnd setz die zyffer darzuo / Heb zuo oeberst an vnd setz 12 darnach setz bey den punckten herum zal /1/2/3/etc. byß wider auff 12 / Darnach theyl die lini 12/a/ mit 35 punckten in 36 gleiche felt / vnnd heb die ziffer oben an bey dem punckten .12. herab zuo zelen /1/2/3/etc. Darnach nym ein zirckel / vnnd setz jn mit dem einen fuß in den Centrum /a/ vnd den andern setz an der lini /12.a. in den punckten .1. von dann reiß krum gegen der streim lini .1.a. Darnach laß den zirckel mit dem ein fuß stetz in den Centrum .a. still steen / vnd verruck den andern fuß auff der streim lini .12.a. in den andern punckten 2 / vnnd reiß damit ein runden / zwischen den zweyen streim linien /1/a/ vnd /2/a/ Also verruck den ein fuß des zirckels auff der streim lini 12.a. allweg vmb ein grad / vnd reiß mit nach ordnung rund ryß zwischen allen streim linien / byß das du zum dritten mal herum kumbst / Also wirdet der zirckel durch das verrucken yhe mehr ye enger / byß das er schyr zum Centrum a kumbt / So das mit dem zirckel alß gethan ist / alßdann zeuech die schnecken lini von punckt zu punckt / heb bey dem punckten 12 in der zirckellini an / vnnd far zum drytten mal herum byß das du zum Centrum .a. kumbst / wie jch dann das hab auffgeriessen / mit allen noettigen linien dardurch sie gemacht wirdt / vnd darnach lauter wie sie in jr selbs getzogen ist / neben eynander gestellt.
Item noch will jch ein schneckenlini ziehen / reiß auß eim Centrum .a. eyn gantzen zirckelryß / vnd theil jn mit .6/ punckten in 6 gleiche felt / vnnd setz die zal dartzu / also das 6 oben stee vnnd zeuech[2] auß allen punckten der zirckellini streim linien in Centrum .a. Darnach theil die lini .6.a. mit .7. punckten in 8 gleiche felt / darnach thuee jm wie vor / nym eyn zirckel vnnd setz jn mit dem eynn fuß in den Centrum a vnd den andern setz in den punckten[3] .1. in der streim lini .1.a. also thu jm fuor vnd fuor durch die zal all / wie du das ab zuonemen hast auß der vorrigen schnecken lini / soelchs hab jch auch hie nach auffgeryssen mit allen noettigen beystrychen vnd ledig.
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 23. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_023.jpg&oldid=- (Version vom 31.7.2018)