Seite:Duerer Underweysung der Messung 025.jpg

aus Wikisource, der freien Quellensammlung
Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.
21

Nun will jch leren machen ein lini / die einem wolgestalten ey gleich werdt dem thue also / mach ein gerade zwerch lini / der anfang sey .a. vnd end /b. die teyl mit .9. punckten in .10. gleiche felt Darnach nym ein zirckel setz jn mit dem ein fuß mitten auff die lini / in den punckten .5. vnd mit dem andern fuß in den punckten .3. vnd reiß ein gantze runde lini / durch den punckten .7. oben vnnd vnden herumb / Darnach setz eyn zirckel mit dem eynn fuß / in den puncktenn .b. vnnd mit dem andern fuß in den punckten .3/ vondann reiß rund vndersich herab / Darnach setz den zirckel mit dem eyn fuß in den punckten .a/ vnnd mit dem andern in den punckten .7. vnnd reiß auch vondann vndersich herab / wo dann die zwen runden ryß sich schliessen / da setz eyn .e. Darnach reiß vnder der zirckellini eyn zwerch barlini gegen der oebern .a.b. vnd wo dise zwerch lini von den langen runden rissen durch schneiden[1] wirdt / in die selben punckten setz vnder dem punckten .3. ein .c. vnd vnder dem punckten .7. ein d Darnach reiß ein auffrecht lini auß dem punckten .5. in den winckel .e. Vnd wo sie die zwerch lini .c.d/ durchschneit / da setz 10 / Darnach theyl das zirckeltrum zwischen .3. vnd .10. mit eym punckten .f. in der mitt von eynander / Darnach teil das ander trum zwischen .10. vnd .7. auch[2] mit eym punckten[3] .g. in der mitt von eynander / Vnnd dann setz eyn zirckel / mit dem eyn fuß / in den punckten .f. vnd den andern in den punckten .d. vnnd reiß rund vndersich / durch die auffrecht .5.e. Darnach setz den zirckel mit dem eyn fuß auff die ander seyten in den punckten .g. vnd den andern in den punckten .c. vnd reiß von dann vndersich / wo sich dann dise zwuo krum linien schliessen an der auffrechten .5.e. da setz ein .h. Darnach teyl .h.10. mit einem punckten .i. in zwey gleiche felt / vnnd setz den zirckel mit dem eyn fuß in den punckten .i. vnnd dem andern in die zirckellini .c.h. auff das kuertzest so du sie er reychen magst / Vnd reiß von dann rund herum / byß zuo dem andern ryß .h.d. Also ist dise eyer lini gemacht / wie sie dann hie vnden mit allen noettigen linien / vnd auch bloß auffgeriessen ist.

  1. ↑ siehe Dürers Anmerkung Im .B. am fuenften plat
  2. ↑ Vorlage: anch
  3. ↑ Vorlage: punckten[Zeilenumbruch]ten
Von „https://de.wikisource.org/w/index.php?title=Seite:Duerer_Underweysung_der_Messung_025.jpg&oldid=3304870“