Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen | |
|
So du aber auß dem Parabel oder brenlini / hie vorn gemelt eyn antzuend spiegel machen wilt / so mach den kegel / darauß du das parabel schneiden wilt / mit seym spitz nit hoeher dann so breyt vnden sein fuß ist / oder das der kegel ein rechter dryangel sey / So du dann ein parabel darein schneidest / vnd nymst die selb lini / vnd machst ein holen spiegel darauß / so schneydt jn vorn ein wenig ab / so brent er starck in dem punckten die zuosamen fallen / so die radi der sunnen darein geworffen werden / die sich wider herauß brechen / das zueuersteen mustu vor mercken / das ein ytlich ding das sich in einem spiegel erscheynt / wie es hynein felt / also bricht es sich wider herauß / vnnd wirdet doch das dinnen[B 1] gesehen an der gegenwertigen stat / des das heraussen ist / darumb wirdt das linck recht vnnd widerum / das will jch zuobesserm verstand vnden aufreissen / Also jch reiß ein zwerch lini .a.b. darbey verstee ein planen spiegel / oder ein wasser darein du sichest / Nun stell jch ein liecht .c. in der hoech auf ein seyten / vnd stell ein maendlein dargegen auf die ander seyten / das in den spiegel oder ins wasser sehe / des aug sey .d. so findt sich das licht .c. dem aug nit ehr dann byß die winckel des liechtz radi .c. vnd des gesichtzs .d. streim linien gleich werden / das begibt sich also / Wenn du auß dem punckten[1] .e. darin sich die widerbrechung begibt / ein aufrechte lini vbersich zeuechst / vnd ein zirckel mit dem ein fuß in disen punckten .e. setzt / vnd mit dem andern fuß von der lini .a.b. vber sich herum reist / vnd findest durch die maß das die radi des lichtz .c. vnd des gesichtz streim lini .d. gleych weyt von der aufrechten lini sind / so ist es der recht punckt darinn das licht funden wirdet / Wenn dann dein gesicht vndersich durch den spiegel streicht / vnd auß dem oebern liecht .c. ein aufrechte lini herab felt so find sichs bey der durch streichetten lini .d. wie tyf sich das liecht im spiegel oder wasser erscheynt / Zuo gleicher weiß nach seiner art / stossen sich die radi der sunnen / im spigel der auß der lini des parabels gemacht ist hergegen / vnnd fallen all herauß in einen punckten / vnd brennen starck / vnd was die vrsach sey / das haben die Mathematici angetzeigt / wer da will mags lesen / Dise mein oebre meynung sichst du vnden aufgeryssen.
Anmerkungen (Wikisource)
- ↑ Vorlage: pnnckten
Wortbedeutungen
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 37. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_037.jpg&oldid=- (Version vom 31.7.2018)