Seite:Duerer Underweysung der Messung 047.jpg

	Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen

Nvn will jch einer andern art / durch ein zirckeltrum / linien gegen einander ziehen / vnd ordenlich^[1] gegen einander erlengern / dem thu^o jch also / Ich reiß ein zirckeltrum /b/c/ auß einem Centrum /a/ vnd zeu^ech ein aufrechte .a.b. vnd ein andre zwerch lini .a.c. also das das .a. ein rechter winckel sey / Darnach teyl jch .a/c mit vier punckten in /5/ felt / vnd zeu^ech auß dem punckten 4 aufrecht barlinien vbersich ins zirckeltrum .b.c. vnnd wo sie das anru^eren / da setz jch auf die zal /1d/2e/3f/4g/ dise vier linien halten sich einer sondern art gegen eynander / Darnach went jch das zirckeltrum mit seinen bustaben vmb / also das /b/a/ vber zwerch / vnd a c aufrecht werd / vnd dann zeu^ech jch aufrecht linien / auß den punckten des zirckeltrums .d.e.f.g/ herab in die zwerch lini /a/b/ so halten sich diese linienn auch einer sondern art gegen einander / vnd man soll auch mercken / wie sich bey disen lengen all jre^[2] breite vnd dicke begeben / vnnd wie sich ein yde in jrer gestalt gegen der andern halt / wie jch das nachfolget hab aufgeryssen.

45

Nachfolget will jch durch ein hol zirckeltrum / die linien in jrem ab vnnd zu^onemen vergleichen / vnd antzeigen / was sie in einem plano oder Corpus fu^er ein gestalt geben / so jr breite vnd dicke die zu^e jrer leng geho^ert ersu^echt wirdet / dem thu^e jch also / Erstlich reiß jch ein aufrechte / recht winckliche vberlengte fierung / die sey oben /a/b/ vnden /c/d/ vnd setz ein zirckel mit dem ein fuß in den punckten .a/ vnd den andern^[3] in das /b/ vnnd reiß von dann rund vbersich / biß in die seyten /a/d/ Darnach theyl jch die seyten .c/d/ mit vier punckten in 5 felt / vnnd von dann zeu^ech jch vier gerad linien vbersich / biß an die hol zirckellini / vnd wo sie die ru^eren / da setz jch auf /1e/2f/3g/4h/ Nun sichstu wie sich dise linien gegen einander halten / vnd so sie oben mit einer zwerch lini abgeschnytten werden / was sie fu^er ein breyte oder Corpus biß an die ander lenger lini erlangen / So jch nun dise fierung / auf ein seiten leg / also das /d/a/ oben vnd b c vnden komen / vnd far auß den punckten der holen lini .e.f.g.h. mit geraden linien herab auf die zwerchen /b/c/ so sichstu wie sie sich in der leng gegen einander halten / Vnnd so jch auß den punckten .h.g.f/e/ vber zwerch far an die lenger lini / so sicht man was es fu^er ein ebne oder Corpus gibt / die mag man rund oder gefiert machen / Solchs sichstu nachfolget aufgeryssen.

Anmerkungen (Wikisource)

1. Vorlage: ordnelich
2. Vorlage: jrer
3. Vorlage: anden

Empfohlene Zitierweise:
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 47. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_047.jpg&oldid=- (Version vom 31.7.2018)