Seite:Literarischer Verein Stuttgart IX 108.png

	Verschiedene: Bibliothek des Literarischen Vereins in Stuttgart (Band IX)

3.

Nv wol dan welt ir die warheit schowen(H. 1, 241^a)

gen wir zv̊ des meien hochgezite
der ist mit aller siner crefte komen.
Seht an in vnd seht an werden frowen
weders da dc ander vberstrite
dc bezer teil dc han ich mir genomen.
owe der mich da weln hiezi
dc ich da dc eine dvr dc ander liezi
obe ich ze rehte danne kvre
her meie^[1] ir mvzent merze sin
ê ich mine frowen da verlvre.

4.

     Aller werdecheit ein vu^egerinne

dc sit ir zware frowe mazze
er selic man der ivwer lere hat
der endarf sich ivwer niender inne
werder^[2] zehove schamen noch ander straze.
dvr dc sv̊che ich frowe ivwern rat.
dc ir mich ebene werben leret.
wirb ich nider^[3] wirb ich hohe ich bin verseret
ich wc vil nach zenidere tot
nv bin ich aber zehohe siech
vnmaze enlat mich ane not.

5.

Nidere minne heizet div so swachet(L. S. 47.)

dc der mv̊t nach kranker liebe ringet
div minne tv̊t vnlobeliche we.
hohe minne reizet vnd machet
dc der mv̊t nach hoher wurde vf swinget
div winket mir nv dc ich mit ir ge.
mich wundert wes div maze beitet.
kvmpt div herzelibe ich bin iedoch verleitet
min ovgen hant ein wip ersehen
swie minneclich ir rede si
mir mac doch schade von ir geschehen.

1. Aus merz gebessert.
2. So, lies weder.
3. wirb ich nider steht doppelt.

Empfohlene Zitierweise:
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 108. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_108.png&oldid=- (Version vom 15.11.2018)