[WA.DB 7,138]
In der Ersten Epistel hat sanct Paulus die Corinther hart gestrafft ynn vielen stucken, scharffen weyn ynn die wunden gossen, vnd sie erschreckt. Nu aber eyn Apostel sol eyn trostlicher prediger seyn, die erschrocken vnd bloden gewissen auff tzurichten, mehr denn zuschrecken. Darumb lobt er sie nu widderumb ynn diser Epistel, vnd geust auch ole ynn die wunden, vnd thut sich wunder freuntlich zu yhn, vnnd heysset den sunder mit lieb widder auffnemen.
Am ersten vnd andern Capitel, zeygt er seyne liebe gegen sie, wie er alles geredt, gethan vnd geliden habe zu yhrem nutz vnd heyl, das sie ia sich alles besten zu yhm versehen sollen.
Darnach preysset er das Euangelisch ampt, wilchs das hohist vnd trostlichst werck ist, zu nutz vnd heyl der gewissen, vnd zeygt wie das selb edler sey, denn des gesetzs ampt, vnd wie das selb verfolget wirt, vnd doch zunympt an den glewbigen, vnd eyn hoffnung macht durchs creutz der ewigen herlickeyt, Das thut er am dritten, vierden, vnd funfften Capitel.
Am sechsten vnd siebenden, ermanet er sie, das sie solcher predigt folg thun mit wercken vnd leyden, vnnd beschleusts mit yhrem lobe, das er sie reytze fort zu faren.
Am achten vnd neunden ermanet er sie, das sie auch mit zeytlicher narung steur vnnd hulff thetten den heyligen zu Jerusalem ynn der tewren zeyt, wilche von anfang yhre gutter alle hatten vbergeben, Act. iiij.
Am zehenden, eylfften vnd zwelfften hat er mit den falschen Aposteln zuschaffen.
Am dreytzehenden, drewet er den die gesundigt hatten, vnnd sich nicht besserten.
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 276. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_282.jpg&oldid=- (Version vom 2.10.2016)
- ↑ Druckfehler im Original: Vorredē. Hier nach WA.DB korrigiert.
