[WA.DB 7,260]
Paulus eyn Apostel Jhesu Christi: nach dem befelh
Gottis vnsers heylands, vnd des herrn Jhesu Christi, der vnser hoffnung ist.
2 Timotheo meynem son von art durch den glawben.
Gnad, barmhertzickeyt, fride von Gott vnserm vater vnd vnserm herrn Jhesu Christo.
3 Wie ich dich ermanet habe, das du zu Epheso bliebest, da ich ynn Macedonian zoch, vnd gepottist etlichen, das sie nichts anders lereten, 4 auch nicht acht hetten auff die fabeln vnd der geschlecht register, die keyn ende haben, vnd bringen fragen auff, mehr denn pesserung ynn Got am glawben. 5 Denn die hewbtsumma des gepottis ist, Liebe von reynem hertzen vnd von guttem gewissen vnd von vngeferbetem glawben. 6 Wilcher haben ettlich gefeylet vnd sind vmbwand zu vnnutzem geschwetz, 7 wollen der schrifft meyster seyn, vnd verstehen nicht, was sie sagen, odder was sie setzen.
8 Wyr wissen aber, das, das gesetz gut ist, so seyn yemand recht braucht, 9 vnd weyß solchs, das dem gerechten keyn gesetz geben ist, sondern den vngerechten vnd vngehorsamen, den gottlosen vnd sundern, den vnheyligen vnd vnreynen, den vatter mordern vnd mutter mordern, den todschlegern, 10 den bulern, den knabenschendern, den menschdieben, den lugenern, den meyneydigen, vnd so etwas anders der heylsamen lere widder ist, 11 nach dem Euangelio der herlickeyt des seligen Gottis, wilchs myr vertrawet ist.
12 Vnd ich dancke dem, der mich bekrefftiget hat ynn Christo Jhesu vnserm herrn, das er mich fur trewe geachtet hat, vnd gesetzt ynn das ampt, 13 der ich zuuor war eyn lesterer vnd eyn verfolger vnd eyn schmecher, aber myr ist barmhertzickeyt widderfaren, denn ich habs vnwissend than ym vnglawben, 14 Es ist aber deste reycher geweßen die gnade vnsers herrn Jhesu Christi, durch den glawben vnd die liebe ynn Christo Jhesu.
[262] 15 Denn das ist yhe gewißlich war, vnd eyn thewr werdes wortt, das Christus Jhesus komen ist ynn die welt die sunder selig zumachen,
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 329. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_335.jpg&oldid=- (Version vom 13.10.2016)
