13 Jch gepiete dyr fur Gott, der alle ding lebendig macht, vnnd fur Christo Jhesu, der vnter pontio Pilato betzeuget hatt eyn gutt bekentnis, 14 das du haltist das gepot, on flecken, vnuerthaddelich, biß auff die erscheynung vnsers [272] herrn Jhesu Christi, 15 wilchen wirt zeygen zu seyner zeyt, der selige vnd alleyn geweltiger, der konig aller konige vnd herr aller herrn, 16 der alleyn hat vnsterblickeyt, der da wonet ynn eynem liecht, da niemant zu komen kan wilchen keyn mensch gesehen hat noch gesehen kan, dem sey eehr vnd ewigs reych, Amen.
17 Den reychen von dißer welt, gepeut, das sie nicht nach hohem ding trachten, auch nicht hoffen auff den vngewissen reychtum, ßondern auff den lebendigen Got, der vns dargibt reychlich allerley zuniessen, 18 das sie gutthun, reych werden von gutten wercken, gerne geben, leutselig seyn, 19 schatzsamlen yhn selbs eynen gutten grund auffs zukunfftige, das sie ergreyffen das ewige leben.
20 O Timothee beware die beylage, vnd meyde die vngeystlichen vergebliche wort, vnd das getzenck der falsch berumpten erkentnis, 21 wilche ettliche haben furgeben, vnd haben des glawbens gefeylet. Die gnade sey mit dyr, AMEN.
Geschrieben von Laodicea, die da ist eyn hewbtstad des lands Phrygia Pacatiana.
[WA.DB 7,272]
Djße Epistel ist eyn letze brieff, darynn sanct Paulus Timotheon ermanet, das er fort fare, wie er angefangen habe das Euangelion zutreyben, das auch wol not ist, syntemal viel sind die abfallen, datzu falsche geyster vnnd lerer sich allenthalben erregen, darumb eym bischoff zusteht ymer zuwachen vnd erbeyten an dem Euangelio.
Jn sonderheyt aber verkundigt er am dritten vnd vierden capitel, die ferliche zeyt, am end der welt, darynn das falsch geystlich leben alle welt verfuren sol mit eußerlichem scheyn, darunter allerley boßheyt vnd vntugent yhr wesen habe, Wie wyr leyder ytzt sehen an vnsern geystlichen diße prophecey sanct Paulus altzu reychlich erfullet werden.
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 334. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_340.jpg&oldid=- (Version vom 2.10.2016)
