Seite:Luther Das Newe Testament Deutzsch 397.jpg

	Martin Luther: Das Newe Testament Deutzsch

Die offinbarung Sancti Johannis des theologen.

Das Erst Capitel.

¹ Djs ist die offinbarung Jhesu Christi. die yhm gott geben hatt, seynen knechten zu zeygen, was ynn der kurtz geschehen soll, vnd hatt sie deuttet vnd gesand durch seynen engel zu seynem knecht Johannes, ² der betzeuget hatt das wort Gottis, vnnd des zeugnis von Jhesu Christo, was er gesehen hat, ³ Selig ist der da lisset vnd die da horen die wort der weyssagung, vnd behalten was drynnen geschrieben ist, denn die zeyt ist nahe.

⁴ Johannes, Den sieben gemeynen ynn Asia, Gnad sey mit euch vnd fride, von dem der da ist, vnd der da war, vnd der da kompt, vnd von den sieben geystern, die da sind fur seynem stuel, ⁵ vnd von Jhesu Christo, wilcher ist der trewe zeuge vnd erst geporner von den todten, vnd eyn Furst aller konige auff erden, der vns geliebt hat vnd gewaschen von den sunden mit seynem blut, ⁶ vnd hat vns zu konigen vnd priestern gemacht fur Gott vnnd seynem vater, dem selbigen sey preyß vnd reich von ewickeyt zu ewickeyt Amen ⁷ Sihe, er kompt mit den wolcken, vnnd es werden yhn sehen alle augen, vnd die yhn gestochen haben, vnd werden heulen alle geschlecht der erden, iah, Amen, ⁸ Jch byn das a vnd das o, der anfang vnd das ende, spricht der herre, der da ist, vnd der da war, vnnd der da kompt, der almechtige.

⁹ Jch Johannes, ewer bruder, vnd mitgenosß am trubsall vnd am reych vnd an der geduld Jhesu Christ, war ynn der Jnsulen Pathmos vmb des wortt Gottis willen vnd des zeugnis Jhesu Christi, ¹⁰ ich war ym geyst am suntage, vnd horete hynder myr eyne grosse stym, als eyner posaunen, ¹¹ die sprach, Jch byn das a vnd das o, der erst vnd der letzt, vnd was du sihist, das schreybe ynn eyn buch, vnd sende es zu den gemeynen yn Asia, gen Epheson, vnd gen Smyrnen, vnd gen Pergamon, vnd gen Thyatiras, vnd gen Sardis, vnd gen Philadelphian, vnd gen Laodicean.

¹² Vnnd ich wand mich vmb, zu sehen nach der stym die mit myr redet, [I.] vnd als ich mich wand, sahe ich sieben gulden leuchter, ¹³ vnd mitten vnter den guldenen leuchtern, eynen, der war eyns menschen son gleych, der war angethan mit eynem leynen kytel, vnd begurtet vmb die bruste mit eynem gulden gurtel, ¹⁴ seyn hewbt aber vnd seyn har war weys wie eyn weysse wolle, als der schnee, vnnd seyne augen wie eyn

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 391. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_397.jpg&oldid=- (Version vom 16.1.2018)