Seite:Luther Das Newe Testament Deutzsch 415.jpg

	Martin Luther: Das Newe Testament Deutzsch

Das Neunde Capitel.

[VIII.] ¹ Vnnd der funfft Engel posaunet, vnd ich sahe eynen sternen gefallen vom hymel auff die erden, vnd yhm wart der schlussel zum brunnen des abgrunds geben, ² vnnd er thet den brun des abgrunds auff, vnnd es gieng auff eyn rauch eyns grossen ofen, vnd es wart verfinstert die sonne vnd die lufft von dem rauch des brunnen, ³ vnd aus dem rauch kamen hewschrecken auff die erden, vnd yhn ward macht geben, wie die hewschrecken auff erden macht haben, ⁴ vnd es ward zu yhn gesagt, das sie nicht beleydigeten das gras auff erden, nach keyn grunes, nach keynen bawm, sondern die menschen, die nicht haben das siegel Gottis an yhren styrnen, ⁵ vnd es ward yhn geben, das sie sie nicht todten, sondern quelleten funff monden, vnd yhr quall war wie eyn qual des scorpion, wenn er eynen menschen hewet, ⁶ vnnd zu den selben tagen werden die menschen den tod suchen vnd nicht finden, werden begeren zu sterben, vnd der tod wirt von yhn fliehen.

⁷ Vnd die hewschrecken sind gleych den rossen die zum kriege bereytt sind, vnd auff yhrem hewbt wie kronen dem golde gleych, vnd yhr antlitz gleych der, menschenantlitz ⁸ vnnd hatten hare wie weyber har, vnd yhre zeene waren wie der lewen, ⁹ vnnd hatten pantzer wie eyßern pantzer, vnd das rasselln yhrer flugel wie das rasselln an den wagen der rosß, die ynn krieg lauffen, ¹⁰ vnd hatten schwentze gleych den scorpion, vnnd es waren stachel an yhren schwentzen, vnnd yhre macht war zu beleydigen die menschen funff monden, ¹¹ vnnd hatten vber sich eynen konig eynen Engel aus dem abgrund, des name heyst auff hebreysch, Abaddon, vnd auff kriechisch hat er den namen Apollyon,Abaddon
Apollyon
verderber ¹² Eyn weh ist dahyn, sihe, es komen noch zwey weh nach dem.

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 409. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_415.jpg&oldid=- (Version vom 6.10.2016)