Seite:Luther Das Newe Testament Deutzsch 421.jpg

	Martin Luther: Das Newe Testament Deutzsch

Das Eylfft Capitel.

[XI.]¹ Vnd es wart myr eyn rhor geben, eynem stecken gleych, vnd sprach, stand auff vnnd misß den tempel Gottis vnd den alltar vnd die drynnen anbeten, ² vnd den ynnern Chor des tempels wirff hynaus vnd misß yhn nicht, vnd er ist den heyden geben, vnnd die heylige stadt werden sie vertretten zween vnnd viertzig monden, ³ vnnd ich will meyne zweenen zeugen geben, vnnd sie sollen weyssagen tausent zweyhundert vnd sechtzig tage, angethan mit secken, ⁴ dise sind zween olebawm vnd zwo fackeln, stehend fur dem Gott der erden.

⁵ Vnd so yemand sie will beleydigen, so gehet das fewr aus yhrem mund vnd vertzeret yhre feynde, vnnd so yemand sie wil beleydigen, der mus also todtet werden, ⁶ dise haben macht den hymel zu verschließen, das es nicht regene ynn den tagen yhrer weyssagung, vnd haben macht vber das wasser, zu wandeln ynn blut, vnnd schlahen die erde mit allerley plage, so offt sie wollen.

⁷ Vnnd wenn sie yhr zeugnis endet haben, so wirt das thier, das aus dem abgrund auffsteyget, mit yhn eynen streytt hallten vnd wirt sie vbir winden, vnd wirt sie todten, ⁸ vnd yhre leychnam werden liegen auff der gassen der grossen stad, die da heyst geystlich die Sodoma vnnd Egypten, da vnser herr creutzigt ist, ⁹ Vnnd es werden yhre leychnam ettlich von den volckern vnd geschlechten vnd zungen drey tage vnnd eynen halben sehen, vnd werden yhre leychnam nit lassen ynn greber legen, ¹⁰ vnd die auff erden wonen werden sich frewen vber yhn, vnnd wol leben vnnd geschenck vnternander senden, denn dise tzween propheten, queleten die auff erden woneten.

¹¹ Vnd nach dreyen tagen vnd eyn halben, fur ynn sie der geyst des lebens von Gott, vnd sie tratten auff yhre fusß, vnnd eyn grosse furcht fiel vber die sie sahen, ¹² vnnd sie horeten eyne lautte stym vom hymel zu yhn sagen, steyget herauff, vnd sie stygen auff ynn den hymel ynn eyner wolcken, vnnd es sahen sie yhre feynde, ¹³ vnnd zu der selben stund ward eyn groß erdbeben, vnd das zehende teyl der stad fiel, vnd wurden ertodtet ynn der erdbebung, sieben tausent namen der menschen, vnd die andern wurden furchtig, vnd gaben preys dem Gott des hymels, ¹⁴ Das ander weh ist dahyn, sihe, das dritt weh kompt schnell.

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 415. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_421.jpg&oldid=- (Version vom 6.10.2016)