Das man nit betten kan noch syngen
So muoß man hüben dann die haetzen
Do ist eyn klappern vnd eyn schwaetzen
Do muoß man richten vß all sachen
Vnd sunst vil vnfuor mancher hand
Do luogt man wo frow kryemhild stand
Ob sie nit well har vmbher gaffen
Vnd machen vß dem gouch eyn affen
Das nit eyn dieb stiel ettwas dar vß
Die wile man wer zuo kilchen gangen
Ließ er den gouch stan vff der stangen
Vnd brucht die holtzschuoch vff der gassen
Vnd doeubt nit yederman die oren
So kannt man ettwan nit eyn doren
Doch die natur gybt yedem jn
Narrheyt will nit verborgen syn
Der treyb die wechßler vß dem tempel
Vnd die do hatten tuben feyl
Treib er jn zorn vß mit eym seil
Solt er yetz offen sünd vß triben
Er fing gar dick am pfarrer an
Vnd würt biß an den meßner gan
Dem huß gottes heylikeit zuo stat
Do gott der herr syn wonung hat
Sebastian Brant: Doctor Brants Narrenschiff , Basel 1499, Seite 55r. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Narrenschiff_(Brant)_1499_0109.jpg&oldid=- (Version vom 18.8.2016)