vnnd das Closter Seligensted / (die hernach wieder vom Stiffte kommen seyn) gestifftet haben solle. 5. Marquardus / der Anno 880. bey Ebbeckstorff / von den Dänen erschlagen worden. 6. Wigbertus / so ein guter Medicus gewesen / dessen / mit eigner Hand geschriebne / Artzneybücher / man noch allhie / im Thumb / auff der Liberey / finden solle. 7. Walbertus. 8. Sehardus. 9. Deuthardus / (der die grosse güldene Taffel in den Thum allhie gegeben. 10. Ochwinus, der S. Epiphanii Cörper hieher gebracht haben solle. 11. Ossdachus. 12. Gerhardus, oder Gerdagus, so die zwey Dörffer Algermissen / vnd Silbrechthusen / zum Stifft gebracht. 13. S. Berwardus, ein Graff von Sommerschenburg / der Anno 1001. von seinen aignen Gütern / S. Michaelis Closter zu bawen angefangen / welches Er / mit allem fleiß / sehr schön vnd prächtig außgebawet / vnd mit München / Benedictiner Ordens / besetzet hat. Ist gestorben Anno 1024. vnd in besagtem Closter zu Hildeßheim begraben worden. 14. S. Gotthard / oder Godehardus, auß dem Land Bayern bürtig / der zu Hildesheim das Closter zu der Saltzen / in die Ehre S. Bartholomaei gebawet / vnd Anno 1038. allhie im Thumb begraben worden ist. 15. Dethmarus, zu dessen Zeit ein Fewer allda auffgangen; davon die Statt / vnd der Thumb / grossen Schaden gelitten. 16. Azilinus, der eine grosse Glocken / die Wolsingerin genant / machen lassen. 17. Hezilinus, Hezel oder Wezel / der Anno 1063. in den H. Pfingsten / zu Goßlar in der Kirchen / mit Widerado, dem Abbt zu Fulda / ein sehr blutige Schlacht gethan. Er hat allhie zwo Canonischsey gebawet / eine in der Statt / zudem H. Creutz genant / da die hohen Stuffen hinan gehen / vnd eine auff dem Berge / ausser der Statt / in die Ehre S. Mauritii, daselbst Er Anno 1079. begraben worden ist. Dieser Bischoff hat auch die grosse Crone in den Thumb allhie gegeben. 18. Udo. 19. Bruningus. 20. Bertholdus. 21. Bernhardus, ein geborner Graff von Rotenburg an der Tauber / reicher / durch Angeben deß bösen Geistes / Hödeke genant (so sich auffm Hause Wintzenburg auffhielte / Ihn / den Bischoff / auffweckte / vnd sprach: Stehe auff / Plettener / die Graffschafft Wintzenburg ist loß gestorben) die Graffschafft Wintzenburg / zu dem Stifft Hildesheim / gebracht hat. Eben dieser Bischoff Bernhard / hat auch den obgemelten S. Gottharden / den gewesten 14. Bischoff allhie / erhaben / denselbigen geehret / vnd angebetet / vnd Ihm ein Closter / Benedictiner Ordens / im Brule gebawet / welches noch heutigs Tags S. Gotthards Closter genennet wird: vnd ist Er Anno 1153. gestorben / als Er 10. Jahr blind gewesen. 22. Bruno. 23. Herrmannus, vorhin Probst bey dem H. Creutz allhie. 24. Adologus. 25. Berno, der S. Berwardum, den 13. Bischoff allhie / erhaben / canonisirt / als einen Heiligen geehret / vnd angebetten haben solle. 26. Conradus der Erste. 27. Heribertus. 28. Sigefridus. 29. Conradus der Ander / der sechs Clöster gebawet / Eins zu Franckberge für Goßlar; das ander / so ein Jungfrawen Kloster / in diesem Stifft / zu Wülffinghausen; das dritte zu Wintzhausen auff der Aller; vnd die übrigen drey in der Statt Hildesheim / nämblich zu den Brüdern / in die Ehre S. Martini, zu den Pawlern im Brüle / vnd zu den Schwestern für dem Tham-Thor. Er hat auch das Stättlein / vnd Schloß / Rosenthal / wieder gebawet 30.Henricus. 31. Johannes ,vorhin Probst zu S. Moritzen aufm Berge / vor Hildeßheim. Er hat / mit Behendigkeit / das Schloß / vnd die Statt Peine / zusampt der Graffschafft / zum Stifft Hildeßheim gebracht. 32. Otto, ein Hertzog von Braunschweig / vnd Lüneburg / der das Schloß Woldenberge / von dem Graffen zu Woldenberge / bekommen / vnd dasselbe zum Stifft Hildesheim gebracht. 33. Sigfriedus der Ander / ein geborner Graff von Quernvorde / der anfänglich das Stättlein Grünow gebawet / das Stättlein Sarstede gebessert / die Burg Rute gebawet / vnd die Levenburg wieder auffgerichtet. Starb Anno 1310. Der 34. Heinrich der Ander / ein geborner
Matthäus Merian: Topographia Saxoniae Inferioris. Frankfurt am Mayn: Frankfurter Kunstverein, 1853, Seite 141. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Saxoniae_Inferioris_(Merian)_141.jpg&oldid=- (Version vom 16.1.2023)
_141.jpg&oldid=-){kind=link}
_141.jpg&oldid=4181234){kind=link}