Nu mache zu dem ersten das knopflen oder puglen an dem wintperg. vnd nym die weyte des l. vnd teyl von dem e. gegen dem r ein weyten. vnd nym dar nach ein halb weyten des b. vnd secz den zirckel mit einen ortt in das r. vnd teyl wider hin auff gegen dem e. da mach ein strichlen vber die zwerch. vnd bey dem r. auch ein strichlen vber die zwerch. vnd lasse das spiczlen hin durch geen. darnach nym die weyten des c. vnd secz den zirckel mytten in das knopflen. da das n steet. vnd teyl auff beyd seyten gegen dem m. da zeuch es zusamen. so hastu vber die zwerch gar die weyten des a. Darnach mach die plume. die dicken der plumen. die weyten des l. von dem g. byß zu dem i. da mach zwey zwerch strichlen. noch nym die weyten des l. vnd secz den zirckel in die myt. do das h steet. vnd teyl auff yglichen seyten gegen dem v. zwu weyten. do zeuch es zusamen. so hastu vier weyten des schuchs l. so hastu die virung der plumen. Darnach mach die villet. die dicken der villeten eins schuchs des l. von dem k. byß zu dem m. do mach zwen zwerch strich. darnach nym die weyten des b. vnd secz den zirckel mit dem einen ortt in das l. vnd teyl auff die beyd seyten gegen dem o. do zeuch es zusamen. auch teyl es von dem puczlen. byß zu der plumen. vnd von der plumen. byß zu der villet. da zwischen yglichem ein weyt sey.
Hans Schmuttermayer: Fialenbüchlein. , Nürnberg 1489, Seite 9. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Schmuttermayer_Fialenb%C3%BCchlein_009.jpg&oldid=- (Version vom 1.8.2018)
