Seite:Sunthaym Der löblichen 1491 17.jpg

aus Wikisource, der freien Quellensammlung
Dieser Text wurde anhand der angegebenen Quelle einmal korrekturgelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.

durch hilf des benanten marggraff Albrechts von österreich das feld / vnd der selb marggraff Albrecht ward ze ritter vn[d] mit im .c. vnd xx edler Als man zalt nach cristi gepurd M.c. vn[d] xxv iar / vnd starb pald nach sant Lewpolden seinem water Nach cristi gepurd M.c. vn[d] xxxvj iar / vnd der bemelt Albrecht ligt begraben zuo Closternewburg im capitel bey sant Lewpolden seinem vater vn[d] fraw Agnesen seiner muoter.

P. [Heinrich II. Jasomirgott]

HEinrich genant Jochsamergot[1] / des heiligen sant Lewpolden marggrafen in österreich ander sun / der ward vo[n] seinem vater minder liebgehabt dan ander sein brüeder / doch überlebt er sy all / vn[d] ward höher in weltlichen eren dan ir yeder / vn[d] fieng an zuo regieren die marggrafschafft österreich ze hand nach hertzog Lewpolds seines bruoders tod Nach cristi gepurd M.c. vn[d] xlij iar / vnd regieret das land österreich loblich vnd wol xxxv iar / Er was ain frumer vn[d] gotzferchtiger fürst / er ward auch durch Conraten Römischen künig hertzog zuo Swaben / der muoterhalben sein bruoder was gemacht hertzog zuo Pairen nach abgang des obgenante[n] hertzog Lewpolden seines bruodern vn[d] regieret das pairland bey xiij iaren / vn[d] zoch mit dem benanten Conraten Römischen künig in Saxsen / da selben vermahelt der bena[n]t künig Conrat dem benanten hertzog Heinrich fraw Gerdrauten[2] kayser Lotharius hertzogen zuo Saxsen tochter Weilend heinrichs des hoffertigen[3] hertzogen zuo saxsen vnd Pairen gelasne witib / die starb im andern iar / vn[d] het kain kind mit herzog Heinrichen irem gemahel / Er was der viij marggraff vnd der lest / vnd regieret österreich Als ain marggraf xiiij iar / vn[d] hertzog heinrich zoch mit de[m] benanten Conraten Römischen künig / Vn[d] Ludwig künig in franckreich[4] vnd Otten bischofen zu freysingen[5] des bemelten hertzog Heinrichs bruoder / vnd vil ander fürsten vnd herren in das gelobt land[6] über mere Als man zalt nach cristi gepurd M.c. vnd xlvij iar / vnd an dem widerzug im dritten iar / kamen sy in kriechen / da selbs ward im vermahelt sein ander weib fraw Theodora[7] emanuels kayser zuo kriechen müemel / in gegenwürd / des bemelten kayser Emanuels / vnd des obgenanten Conraten Römischen künigs / vn[d] hertzog Heinrich het mit der bestimbten fraw Theodora zwen sün / Lewpolden[8] vnd Heinrichen[9] / vn[d] ain tochter genant Agnes[10] / die vermahelt warde Steffan dem dritten vnd klainen künig ze hungern / Als man zalt nach cristi gepurd M.c. vnd lvj. iar / übergab der bemelt hertzog Heinrich genant Jochsamergot / das hertzogtuomb ze Pairn Heinrichen dem iüngern[11] hertzogen ze Saxsen / der ain natürlicher herre vnd erb was zuo dem benanten Pairland / Vnd der bemelt Heinrich der iünger zuo ainer widerlegu[n]g / gab er dem benanten Heinrichen gena[n]t Jochsamergot das land ob der Enns / Also ward Heinrich Jochsamergot durch kayser Fridrichen denn ersten hertzogen zuo Swaben seinen veternn gemacht erster hertzog zuo österreich inn der stat Regenspurg in beywesen herren Wladislaen hertzogen zuo Behem / Vnd in gegenwürd vil ander fürsten vn[d] herren des reichs / vnd aus bayden landen vnder der Enns vn[d] ob der Enns gemacht ain hertzogtümb Er verhalff auch de[m] bemelten kayser fridrichen dem ersten die stat Mailand belegern vnd gewinen / vnd der bemelt Heinrich Regiert österreich Als ain hertzog xxj iar / Er ist auch begabt worden von dem bemelten

  1. ↑ Heinrich II. „Jasomirgott“ (1107–1177)
  2. ↑ Gertrud von Sachsen (1115–1143), einziges Kind Kaiser Lothars III.
  3. ↑ Heinrich „der Stolze“ (ca. 1108–1139), Herzog von Bayern und Herzog von Sachsen
  4. ↑ Ludwig VII. „der Junge“ (1120–1180), König von Frankreich
  5. ↑ Otto von Freising, siehe „S“
  6. ↑ Zweiter Kreuzzug (1147–1149)
  7. ↑ Theodora Komnena († 1183), Nichte des byzantinischen Kaisers Manuel I.
  8. ↑ Leopold V. (1157–1194)
  9. ↑ Heinrich I. „der Ältere“ (um 1158–1223), Herzog von Mödling
  10. ↑ Agnes, in 1. Ehe 1167 Gemahlin von König Stephan III. von Ungarn, in 2. Ehe 1173 Gemahlin von Herzog Hermann von Kärnten
  11. ↑ Heinrich der Löwe (1129–1195)
Empfohlene Zitierweise:
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 17. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_17.jpg&oldid=- (Version vom 1.8.2018)
Von „https://de.wikisource.org/w/index.php?title=Seite:Sunthaym_Der_löblichen_1491_17.jpg&oldid=3393341“