kayser Fridrichen mit vil besundern löblichen freyhaiten fuor ander fürsten des reichs in sonder / des er vn[d] sein nachkomen hertzogen zuo österreich / ain geritzts kreutzlin in irem hertzog hüetlin füeren söllen / vnd ir lehen ze roß / vnd in irem land / nit auserhalb des landes emphahen mügen / der benant hertzog heinrich hat gestifft das gotzhaus zuo den Schotten[1] zuo Wien sant Benedicten orden / vn[d] das mit schotten besetzt vnd reichlich begabet / Er hat auch erweittert die stat Fauiana / die nun Wien hayst[2] / Auch hat er gepessert die andern stet vnd sloß in österreich vn[d] hat gepaut die ersten purgk zuo wien am hoff[3] / an dem end / da nun das Closter vnser lieben frawen brüeder von dem perg Carmeli stet / das man yetzund nent zuo den weissen brüedern / Vn[d] da selbs gehalte[n] sein fürstlichs geseß / Er hat auch dem gotzhaus zum heiligen kreütz Mynkendorff[4] vnd Sigenfeld[5] gegeben / vn[d] volbracht das paw gantz vnd gar da selbs Das sein vater angefangen het / vnd hat gestritten zwen feltstreit mit herren Geysa künig ze hungern dem andern[6] / an dem wasser gena[n]t die Leytta[7] / Er hat auch mit herren Welfen dem altern hertzogen zuo Pairn in Pairen gestritten / vnd mit herren Otacker dem iüngern[8] marggrafen in Steir auch mit herren Sobeslaen[9] künig zuo Behem / die hungern vnd behem haben vil übels in österreich begangen mit raub vn[d] prand / zuo des benanten hertzog Heinrichs zeiten / der benant hertzog heinrich Jochsamergot / viel von ainem pferd / das er kurtzlich nach dem selben val sterben muost / Vnd starb als man zalt Nach cristi gepurd M.c. vn[d] lxxvij iar / vnd ligt begraben zuo Wien zuo den Schotten in der kirchen seiner stift / Aber fraw Theodora sein gemahel starb nach im Nach cristi gepurd M.c. vn[d] lxxxij iar / vnd die selb Theodora Auch fraw Agnes ir tochter ligent bayde bey hertzog Heinrichen zuo den Schotten begraben / v[er]liessen zwen sün Lewpolden vnd Heinrichen / Da von hernach geschriben stet.
Q. [Leopold IV.]
LEwpold[10] genant der iünger vnnd milt / des heiligen sant Leupolds marggrafen in österreich dritter sun / ward seinem bruod[er] Heinrichen in dem regiment durch seinen vater aus liebe so er zuo im het vorgesetzt / vnd fieng an zuo regieren die marich österreich Nach cristi gepurd M.c. vnd xxxvj iar / pald nach seines vatern vnd Albrechten[11] seines bruodern tod / Er was ain frischer manlicher vn[d] iunger fürst / vnd der vij marggraff in österreich Vnd regiert österreich als ain marggraf vj iar / vnd als her Conrat Römischer künig hertzog zuo Swaben in dz pairland zoch Nach cristi gepurd M.c. vn[d] xxxviij iar / machet er den benanten Lewpolden der muoterhalben sein bruoder wz hertzog zuo paire[n] / dar aus entspru[n]gen dem pairland vil krieg Also regieret hertzog Lewp[old] das Pairland gewaltigclich vnd des adel der merer tail wz mit im vndertenig / Auch Regenspurgk die haubstat inn Pairen die do was der fürsten des landes gesaeß / die macht er im auch vndertenig / vnd hielt da selbs sein fürstlichs geseß Der bemelt hertzog Lewpold belegert ain gsloß in Pairn genant Phalegia[12] das selb was zwaier brüeder die selben baid allain ware[n] mit hertzog Heinrich genant der hoffertig[13] hertzog zuo Saxsen vn[d] zuo Pairen / des obgena[n]ten hertzog Lewpolds veint / de[m] kam ze hilff herr welff der elter hertzog zuo pairn[14] hertzog heinrichs des hoffertige[n] bruod[er] / da wurd ain herter streit vn[d] vil volck auf baide[n] tailen erslagen vn[d] hertzog Lewp[old] muost weichen des überna[m] sich
- ↑ Schottenstift in Wien
- ↑ siehe Wien in Zedler Bd. 56
- ↑ Burg „Am Hof“ in Wien in der Nähe des Schottenstifts, heute u. a. Standort der Kirche am Hof
- ↑ Münchendorf
- ↑ Siegenfeld, heute zu Heiligenkreuz bei Baden
- ↑ Géza II. (1130–1162), König von Ungarn
- ↑ Leitha
- ↑ Ottokar III. (1129–1164), Markgraf der Steiermark
- ↑ Soběslav II. (um 1128–1180), König von Böhmen
- ↑ Leopold IV. (um 1108–1141), ab 1136 Markgraf von Österreich, ab 1139 auch Herzog von Bayern
- ↑ siehe „O“
- ↑ Valley
- ↑ Heinrich der Stolze
- ↑ Welf VI.
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 18. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_18.jpg&oldid=- (Version vom 27.5.2021)