hertzog welff vn[d] zoch kurtzlich dar nach gegen dem obgemelte[n] Conratten Rö[mischen] künig / der do mit velde vor weinsperg[1] lag / vnd wolt in da selbs aus dem feld geslagen haben / Aber hertzog wellff verlor da selben vil volckes vn[d] mit wenig seiner diener gab er die flucht / nicht lang dar nach als hertzog lewpold de[n] burgern zuo Regenspurg ire recht setzet vnd ordnet / da warde durch herren Otten Pfaltzgrafen zuo wittelspach[2] gemacht ain auflauff in dez als hertzog Lewpold vn[d] sein hofgesind den pofel durch ainander lauffen sahen legte[n] sy harnasch an und zunten in etlichen gassen die heüser an / vn[d] komen also aus der stat / vn[d] wüstet da selbs vmb weit vnd prait vn[d] tet in großen schaden / vnd der bemelt herzog Lewpold enthielt sich ain zeit im land ausserhalb der stat / vn[d] besamlet sich starck / vnd legert sich nit ver von der stat / vnd durch ain merckliche sum geltes wurden sy mit im veraint / Dar nach wolt er rechen die schmach die im vor de[m] gsloß phalaia von dem benanten hertzog welffen geschehen was / vnd zoch mit werhaftiger hand piß an dz wasser genant der Lech / vnd prach da selbs ettlich besetzung seiner veind / vn[d] wüstet das land da selbs weit vnd prait / vn[d] an dem haimzug zoch er über des pistumbs von Freysingen güeter / die auch von seinem volck beschediget warden / der egemelt hertzog Lewpold begabet das gotzhaus zuo kotweig reichlich Er gab auch dem Closter zum heiligen kreütz Drumaw[3] vn[d] Tallern[4] Weingarten Wismat[5] Wald vn[d] vischwaid / vnd im ward vermahelt Als man zalt nach cristi gepurd M.c.xxxviij iar / fraw maria[6] hern Sobeslaw hertzog zuo Behem tochter / der do was ain sun herren Wratislaen künig zuo Behem vn[d] het kain kind mit ir / vnd er regieret österreich vj iar / vnnd das Payrland iiij iar / Nicht la[n]g dar nach als der obgemelt hertzog Lewpold den wüest in pairn thet / ward er zuo regenspurg kranck vnd in dz Closter Nidern alttach[7] passauer pistumbs gefürt / da er dan abgeleibt ist / Als man zalt nach cristi gepurd M.c. vn[d] xlij iar / vnd ward von dannen gefürt zum heilige[n] kreütz in österreich / da selbs ligt er begraben im Capitel / vnd sein bruoder heinrich / genant Jochsamergot volget im nach im regiment baider land pairn vn[d] österreich / Als obgemelt ist.
R. [Ernst der Jüngling]
ERnst[8] genant der iüngling / des heiligen sant Lewpolds marggraffen in österreich vierder sun / ain schöner vnd wolgestalter iüngling bey xviij iaren / des lob an dem Rein hoch gepreyset ist / dem was wol mit iagen vnd aller waidmanschafft / der bemelt Ernst starb an weib vn[d] kinder in plüender iuge[n]d vn[d] liget begraben zum heiligen kreütz in österreich im Capitel da nebe[n] hertzog Lewpolden von pairn marggrafen in österreich seine[m] bruoder den bayden got der almechtig genedig vn[d] barmhertzig sein wölle.
S. [Otto von Freising]
OTto[9] der fünfft sun des heiligen sant Lewpolds marggraffen in österreich ain hochgelerter geistlicher seliger bischoffe zuo Freising hat in seinen iungen tagen gestudiert die siben freyen künst zuo pariss in franckreich inn dem nach abgang hern Otte[n] des erste[n] probsts zuo Closternewburg des bemelte[n] sant Lewpolden stift / ward er zuo probst gesetzet vnd pracht aus franckreich ettwe vil heiltumb / dar nach zoch er widerumb gen pariss vnd
- ↑ Weinsberg bei Heilbronn
- ↑ wohl Otto V. († 1156), Pfalzgraf von Bayern
- ↑ Trumau
- ↑ Klosterweingut Thallern, heute zu Gumpoldskirchen
- ↑ Wiesen, vgl. Grimm: Wiesenmahd und Wismut
- ↑ Maria von Böhmen († um 1160), Tochter Herzogs Soběslav I. und Enkelin Königs Vratislavs II. von Böhmen
- ↑ Kloster Niederaltaich
- ↑ Ernst (1113–1137)
- ↑ Otto von Freising (um 1112–1158), seit 1138 Bischof von Freising, einer der bedeutendsten Geschichtsschreiber des Mittelalters
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 19. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_19.jpg&oldid=- (Version vom 1.8.2018)
