krütz im Capitel in aine[m] grab / Verliessen hinder in / Heinrichen iren sun von dem hernach gemelt wirt.
Z. [Friedrich I. der Katholische]
FRiderich genant der kristenlich[1] ain andechtiger gotförchtiger redlicher fürst / herrn Lewpolds des tugentreichen hertzoge[n] zuo österreich vn[d] zuo Steir erstgeborner sun / vnd hern Lewpolds des ernreichen hertzogen zuo Steir bruoder / der bena[n]t Fridrich ward hertzog zuo österreich zehand nach seines vaternn hertzog Lewpolds des tugentreichen tod / nach cristi gepurd M.c. vn[d] xciij iar. Er was der drit hertzog zuo österreich / vn[d] regiert östereich loblich vn[d] wol v. iar Es wz zuo des benanten hertzog Fridrichs zeyten ain großes hunger iar / das leüt vn[d] vich hungers starben / Es ware[n] auch zuo seinen zeyten haberschrecken die hette[n] vier flügel / die flugen durch hungern durch die Steirmarich vn[d] durch krain / vn[d] verderbten da selbs alles das da was / vnd wan sy aufflugen so wz es so vinster als ob es neblig wer / Er begabet auch das gotzhaus des heiligen kreütz mit dem dorff genant wetzldarf / Vn[d] als ma[n] zalt nach cristi gepurd M.c. vn[d] xcv iar. zoch der benant hertzog Fridrich von österreich mit vil andern fürsten vn[d] herren aus tütschen landen gen hyspanien wider ain vnzalbare menig der hayden / die aus affrika in hyspaniam getzogen waren / in dem selben streit laider vil cristen erslagen warden / Vnd als man zalt nach cristi gepurd M.c.xcvij iar. zoch der bena[n]t hertzog Fridrich vo[n] österreich mit vil ander fürsten vn[d] herren über mer in das heilig land / vn[d] nam an sich das zeichen des heiligen kreütz / das dan vil ander fürsten vn[d] herren gaistlich vnd weltlich / auf ermanung kayser Heinrichs des sechsten an sich namen wider die haiden / zuo widerbringu[n]g iherusalem vn[d] das heilig land / dz vo[n] den haiden der kristenlichen kirchen vor abgedrungen was / vn[d] im andern iar desselbigen zugs / der do was nach cristi gepurd M.c. vnd xcviij iar. gab der bemelt hertzog Fridrich von österreich in dem heiligen land seligclich auf seinen gaist / vnd ward von dann heraus gen österreich in das Closter des heyligen kreütz gefürt / vnd ligt da selbs im Capitel begraben / Verschied an weib vnd kind / vn[d] her Lewpold der ernreich hertzog zuo Steir sein bruoder / ward im andern iar dar nach hertzog zuo österreich / von dem hernach volget.
a. [Leopold VI. der Glorreiche]
LEwpold genant der ernreich[2] / ain weiser andechtiger güetiger fürst / hern Lewpolds des tugentreichen hertzogen zuo österreich vn[d] zuo Steir ander sün / vn[d] hern Fridrichs des criste[n]lichen hertzogen zuo österreich bruoder / fieng an zuo regieren dz hertzogtu[m]b zuo Steir Als man zalt nach cristi gepurd m.c. vnd xciij iar. zehand nach abgang hertzog Lewpold dz tuge[n]treichen seines vaters / vnd nach abgang hern Fridrichs des kristenlichen hertzoge[n] zuo österreich seines bruoders im andern iar Als ma[n] zalt nach cristi gepurd m.c. vn[d] xcix iar. ward der bena[n]t hertzog Lewpnld vo[n] Steir der ernreich hertzog zuo österreich / Er wz der vierd hertzog zuo österreich vnd der ander hertzog zuo steir des geschlechts / vn[d] in dem obgemelte[n] iar zoch her emrich kü[nig] ze hunger in österreich / vn[d] beschediget dz la[n]d vast mit raub vn[d] mit prand / vn[d] als man zalt nach cristi gepurd .M.cc. iar / ward hertzog Lew[pold] ritter ze pfingsten / mit großer zier ingege[n]würd hern Conrats ertzpischof zuo mentz / vn[d] hern eberhards ertzpischoff
- ↑ Friedrich I. „der Katholische“ (um 1175–1198)
- ↑ Leopold VI. „der Glorreiche“ (1176–1230)
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 23. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_23.jpg&oldid=- (Version vom 1.8.2018)
