Seite:Sunthaym Der löblichen 1491 27.jpg

	Ladislaus Sunthaym: Der löblichen Fürsten und des Landes Österreich Altherkommen und Regierung

hertzogen von Prunsweig / ain müemel fraw Gerdruten künigin zu^o hungern sant Elspethen mu^oter / mit der bestimbten fraw Gerdraute[n] / het der bemelt herzog Fridrich ain vast kostliche fürstliche hochzeit / in der stat Prunsweig in gege[n]würd vil fürsten vn[d] herren / vn[d] als man zalt nach cristi gepurd M.cc. vnd xxix iar. schied hertzog Fridrich die bestimbten frawen Gerdruten von im / vnd hett kain erben mit ir / vn[d] in dem obbestimbten iar na[m] hertzog Fridrich sein ander weib fraw .N. ains hertzogen tochter von meran / dz doch vnpillich was freüntschaft halben / vn[d] das geschach mit gunst vn[d] willen seines vatern hertzog Lewpolds / vn[d] der benant hertzog Fridrich fieng an zu^o regieren die land österreich vn[d] steir mit iren zu^ogeheru[n]gen pald nach abgang des egenanten hertzog Lewpolds seines vaters Als man zalt nach cristi gepurd M.cc. vn[d] xxx iar / vnd er was der fünfte vn[d] leste hertzog zu^o österreich vn[d] der dritte zu^o Steir des geschlechts / Vn[d] im ersten iar seiner regieru[n]g stu^onden wider in auf sein dienstleüt / vn[d] beraubten in seines vatern schatz / darnach verderbten sy dz land österreich mit raub vnd prant / zum lesten warden sy durch in gediemüetiget / vnd satzten im geysel / vn[d] nach cristi gepurd M.cc. vn[d] xxxi iar. warffen sich auf her Hadmar vn[d] her Heinrich geprüeder vo[n] kuenring wider den bemelten hertzog Fridrichen vn[d] her Hadmar starb des selben iars / vn[d] ward begraben zu^o zwettel in dem Closter irer stifft / vn[d] her Heinrich verprante bayd stett / krembs. vn[d] stain.^[1] vnd sein genant die hund von wegen ir poßhait / vn[d] in dem ersten iar der regieru[n]g des bena[n]ten hertzog Fridrichs zoch her Wentzla den man gemaingclich nenet Primislaus künig zu^o Behem^[2] mit ainem großen höre in österreich vn[d] beschediget dz land vast mit raub vn[d] prant / vn[d] als man zalt M.cc. vn[d] xxxij iar / an vnser lieben frawen tag der liechtmeß / warde der bemelt hertzog Fridrich mit .cc. ander edler in dem Closter zu^o den Schotten zu^o Wien ritter in beywesen hern Gebharts bischofe zu^o Passaw^[3] vn[d] ander vil des adels des landes österreich / vn[d] claydet die selben sein ritter all in scharlach vn[d] weis strich mitten da durch / die klaide all mit vech vnderfüetert / begabet auch die mit pferden vn[d] anderem so zu^o der Ritterschaft dient vnd gehört / Er ist auch gewesen der erst fürst der die burg zu^o Wien gesteürt hat / vn[d] thet das aus rat hern Wolfgers von Paraw / der bemelt hertzog Fridrich pracht zu^o dem land österreich / dz land krain vnnd als man zalt nach cristi gepurd M.cc. vn[d] xxxiij iar / nach dem achten sant Johans gottes teüffer / zoch hertzog Fridrich mit ainem großen höre gen merhern vn[d] gewann Wettaw das gsloß gar in ainer kurtzen zeit / wie wol sein dienstleüt vermainten das vnmüglich zesein / vn[d] als er das ein nam da ergaben sich vil andere gslößer in merhern an in / vn[d] do das her Wentzla künig zu^o Behem erhöret / da zoch er beseytz hindersich durch de[n] Behemer waldt wie wol er im für gesetzt het / hertzog Fridrichen im feld zu^o begegnen / vn[d] in dem obgemelten iar vmb aller heiligen tag zoch herr andre der ander künig ze hungern mit ainem mechtigen höre in österreich wider hertzog fridrichen / vn[d] kam piss gen höflein^[4] / das da ligt bey prugk an der leitta / vn[d] wiestet das land mit raub vn[d] prant vn[d] dem benanten künig wurden vil der seinen erslagen / Auch seiner edelleüt vil gefangen / vn[d] Teben das gsloß vnd der marckt warden außprant / Also woltt künig Andre nicht fürbas ziehen / vn[d] arbait bei dem hertzogen vmb frid / vnnd do er den erlangt nit lang dar nach zoch künig Andre fridlich widerumb auß

1. Krems an der Donau
2. Wenzel I. (* um 1205, † 1253), König von Böhmen
3. Gebhard I. von Plain (1170–1232)
4. Höflein (Niederösterreich)

Empfohlene Zitierweise:
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 27. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_27.jpg&oldid=- (Version vom 1.8.2018)