MEchilt ain gotzförchtige tuge[n]thafte fürstin Ain gemahel herren ernsts des strenge[n] hertzoge[n] zuo Swaben vn[d] marggraff in österreich die het mit hertzog ernste[n] zwen sün / Lewpolde[n] den schöne[n] marggrafen in österreich vnd Albrechten den leichtfertigen landgrafen in österreich vnd ain tochter genant Juditha von der hernach gemelt wirt / die bewerten Cruniken setzen ir geslecht nicht / vn[d] fraw mechilt ligt begraben zuo melkh im Closter bey herrn ernste[n] dem strengen irem gemahel.
JVditha ain schöne adeliche iunckfraw herren ernsts des strengen herzogen zuo Swaben vnd marggraf in österreich / vnd der vorbemelten fraw mechilten tochter starb iunckfrauweise / vn[d] warde von menigclich geclagt vnd begraben mit großen eren zuo melkh im Closter bey herren ernsten dem strengen irem vater / vnd fraw mechilten ir muoter / den got der almechtig genedig vnd barmhertzig sein welle. amen.
ITha ain selige andechtige fru[m]me fürstin / ain tochter her heinrichs des dritten vn[d] güetigen Römischen kaysers vnd grafen zuo kalw gelegen in Swaben / vn[d] ain swester herr Heinrichs des vierden / auch Römischen kaysers vnd grafen zuo kalw / ward vermehelt herren Lewpolden dem schönen marggrafen in österreich / bey dem het fraw Itha zuen sün Sant Lewpolden marggrafen in österreich vnd hern Poppen ertzpischoff zuo Trier vnd die fraw Itha nach abgang marggraf Lewpolds vo[n] österreich ires gemahels zoch zuo dem heiligen grab mit herren Thyemo ertzpischoff zuo saltzburg / vn[d] herren Welphen hertzogen zuo Pairn vnd graff zo alttorf in Swaben gelegen / vn[d] an der widerfart starb die bemelt fraw Itha in kriechen als ma[n] zalt nach cristi gepurd M.c. vnd j iar / vn[d] ligt da selbs begraben Verlies hinder ir vj töchter / davo[n] hernach geschriben stet Vnd zwen sün / den heiligen sant Lewpolden marggrafen in österreich / vnnd hern Poppen Ertzpischoff zuo Trier von den in der tafel der fürsten vor begriffen vnd gemelt ist.
N Ain vernünftige fürstin ain tochter hern Lewpolds des schönen marggrafen in österreich vn[d] fraw itha ain swester sant Lewpolds / die ward vermahelt hern Ottacker dem eltern marggrafen zuo Steir / bey dem het frau .N. hern Lewpolden marggrefen zuo Steir Vnd marggraf Ottacker ir gemahel ligt begraben zuo Gesten im Closter seiner stifft Aber marggraf lewpold ir bayder sun / ligt begraben zuo Rein im Closter seiner stifft Wa aber die benant fraw .N. des bemelte[n] marggraf Ottackers gemahel begraben ligt / auch iren namen vindt man in den bewerten Croniken nicht.
N Ain schöne ersame fürstin ain tochter hern lewpolds des schönen marggrafen in österreich / Vn[d] frau Itha ain swester sant Lewpolds / Die ward vermahelt herren Leotolde[n] marggrafen in merhern / der da wz ain sun hern Conrats hertzogen zuo Behem / Vnd die bestimbt fraw .N. gepar marggraff Leotolden ain sun genant Conrat nach hertzog Conraten seinem een / der bemelt conrat der iünger ward marggraff in merhern / nach marggraf Leotolden seinem vater vnd ward gefangen von hertzog Sobesla von behem seinem vettern Vnd ward gefürt auf das gsloß Fistheradt vnd ward hernach vo[n] dem bena[n]ten hern Sobesla videru[m]b ledig gelassen / d[er] bena[n]t marggraf conrat v[er]trib hern wladislaen hertzoge[n] zuo behem d[er] dar nach kü[nig] zuo behem ward aber
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 35. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_35.jpg&oldid=- (Version vom 1.8.2018)
