herr Conrat Römischer künig hertzog zuo Swaben setzet den bemelten herren Wladislaen wideru[m]b in sein hertzogtuomb zuo Behem vnd marggraf Conratt behielt sein land merhern wideru[m]b / Wa fraw .N. marggraf Leotolds gemahel begraben ligt auch iren namen setzt die Croniken nicht.
HElpirg ain züchtige wolgestalte fürstin / ain tochter herren Lewpolds des schönen marggrafen in österreich vnd fraw Itha ain swester sant Lewpolds / die ward vermahelt Als man zalt nach cristi gepurd M iar herren Borsinoy hertzog zuo behem künig Wratislaen von behem sun / der bemelt hertzog Borsinoy het mit der bena[n]ten fraw helpirgen ain fürstlich hochzeit in der stat Naem in gegenwürd vil mechtiger herren ritter vnd knechten / vn[d] herr Borsinoy het bey der bestimbten fraw helpirgen ain sun genant Jeronimus Der bena[n]t Jeronimus zoch mit herre[n] Lothario Römisen künig hertzogen zuo Saxsen mit iij.c. pferde[n] in welsche land Da herr Lotharius die kaiserliche wirde zuo Rom empfahen wolt d[er] bemelt hertzog Borsinoy wz ain güetiger ainfaltiger frumer fürst Er ward in xv iaren zuo drey malen aus Behem vertriben durch seinen vettern Vlrichen Leotolden Swatopligen vnd Otten all vier marggrafen in merhern / auch durch seinen aigen bruoder Wladislaen hertzogen zuo Behem / der benant herr borsinoy lag auch in den xv iaren vj iar gefangen / vn[d] was etliche iar zuo Pollan im ellend Als man zalt nach cristi gepurd M.c. vnd xxiij iar / starb der bemelt hertzog borsinoy zuo hungern im ellend / vn[d] ward von danen gefürt gen Prag / vnd ward begraben in sant Mertins grufft / die da ist in sant Veits kirchen da selbs zuo Prag fraw helpirgin seiner gemahel begrebnuß / auch herren Jaromiri irs suns setzt die Cronick nit.
N Ain adeliche raine fürstin herren Lewpolds des schönen marggrafen in österreich vn[d] fraw Itha tochter / ain swester sant Lewpolds / der benant marggraff Lewpold der schön / ladet herab von pairn gen österreich graff Conraten den rauchen / vnd vermahelt im fraw .N. sein tochter / vn[d] gab im zuo ir / die grafschaft Peylstain vn[d] was dar zuo gehöret leit vnd guot / fraw .N. vnd graf Conrat ir gemahel hetten nit erben / vnd ire güeter gefielen nach ire[m] tod wideru[m]b an dz land / Wa fraw .N. vn[d] graf Conrat ir gemahel begrabe[n] ligen / auch wer graf Conrat vo[n] geslecht gewesen sey setzen die Croniken nicht.
N Ain seüberliche gotfarchtige fürstin / ain tochter herren Lewpolds des schönen marggrafen in österreich / vn[d] fraw Itha ain swester sant Lewpolds die ward durch iren vater marggraf Lewpolde[n] verheyrat graf Sigharten / der genent ward das scharsach[1] / vn[d] marggraf Lewpold gab dem bemelten graf Sigharten zuo fraw .N. seiner tochter / die grafschaft Schala vn[d] was dar zuo gehört leüt vnd guot / die gewunen kind vnd enikel die starben on erben / vnd ir herschaft gefiel widerumb an das land / wa graf Sighart vn[d] fraw .N. sein gemahel begraben ligen / auch wer graff Sighart von geslecht gewesen sey / setzen die Croniken nicht.
N Ain güetige fru[m]me fürstin / ain tochter herren Lewpolden des schönen marggrafen in österreich / vnd fraw Itha ain swester sant Lewpolds / die benanten fraw .N. vermahelt marggraf Lewpold ir vater ainem mechtigen herren vnd gab im zuo ir / ybs vnd pösenpewgen / vn[d] was zuo den bayden herschaften gehört leüt vnd guot / wa fraw .N. vnd ir gemahel begraben lige[n]
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 36. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_36.jpg&oldid=- (Version vom 1.8.2018)
