Auch wer er von geslecht gewesen sey setzen die bewerten hystorien nicht.
N Ain schöne freüntholde fürstin / Vnd ain tochter aines hertzogen von Polan vnd ain gemahel herren Albrechts des leichtfertigen landgraf in österreich Die bemelt fraw .N. het mit dem benanten landgraf albrechten irem gemahel kain erbenn / ir begrebnuß setzt die Cronick nicht / Aber landgraf Albrecht ligt begraben zum heiligen kreütz im Closter im capitel daselbs Als oben in der Tafel der fürsten gemelt ist.
AGnes ain andechtige gotforchtige fürstin herren Heinrichs des dritte[n] vnd güetigen Römischen kaysers vnd grafen ze kalw in Swaben gelegen enekel herren heinrichs des vierde[n] Römischen kaysers tochter vn[d] herren heinrichs des fünften auch römischen kaysers vnd herren Conrats Römischen künigs geprüeder swester / herren marquarts des elltern hertzogen zuo kerndten / vnd marggrafen zuo Steir gemahel fraw linpirgen swester / vn[d] hern Solomons künigs ze hungern gemahel fraw Sophien swester / die bestimbtt fraw Agnes ward durch iren vater kayser heinrichenn den vierden vermahelt herren Fridrichen vo[n] hohen stauffen / vn[d] der benant herr Fridrich ward durch den bemelten kayser heinrichen den vierden seinen sweher hertzogen zuo swaben gemacht / des vorfordern Ruodolff vn[d] Berchtold hertzoge[n] zuo Swaben ir fürstlichs geseß gehabt haben zuo Zürch / vnd der benant hertzog Fridrich vo[n] Swaben het mit der bestimten fraw Agnesen zwen sün Fridrichen hertzogen zuo Swaben / vnd Conraten Römischen künig hertzogen zuo Francken / hertzog Fridrichen von Swaben der iünger fraw Agnesen erstgeporner sun / hette herren Fridrichen hertzogen zuo Swaben der nach mal Rö[mischer] kayser warde genant Barbarossa / vnd Conraten phaltzgrauen bey Rein / vn[d] Conrat Römischer künig herzog zuo Francken fraw Agnesen ander sun / hette zwen sün Heinrichen Rö[mischen] künig / vnd Fridrichen hertzogen zuo Swaben / kayser Fridrich der erst gena[n]t Barbarossa fraw Agnesen Enekel / hette fünff sün Heinrichen de[n] sechsten Rö[mischen] kayser zuo Nappels / vnd Sicilien hertzogen zuo Swaben / Fridrichen hertzoge[n] zuo Swaben / Otten grafen zü Bisantz in hochburgundi gelegen / Conratten hertzogen zuo Swaben / Philippen Römischen künig hertzogen zuo Swaben / kayser heinrich der sechst het hern Fridrichen den andern Römischen kayser zuo iherusalem Nappels vnd Sicilien künigen hertzogen zuo Swaben. der het siben sün / drey eelich vnnd vier pastharten / Heinrich der erst eelich sun kayser Fridrichs des andern Römischer künig / hertzog zuo Swaben Jordanis der ander eelich sun des obgemelten kayser Fridrichs / der starb in seiner iugent / Conrat Römischer zuo Jherusalem Nappels vnd Sicilien künig hertzog zuo Swaben des egenanten kayser Fridrichs dritter eelicher sun / fridrich der erst vnelich sun kayser fridrichs obgemelt künig in Tustia[1] / Ecius künig in Lamparte[n][2] / der ander vneelich sun des bena[n]ten kayser Fridrichs / Heinrich künig in Sardinia / der drit vneelich sun des bestimbten kayserß / Manfredus kunig zuo Nappels vnd Sicilien[3] / der vierd vneelich sun kayser Fridrichs des anderen / Heinrich Römischer künig hertzog zuo Swaben kayser Fridrichs des andern erstgeporner sun / hette zwen sün / Fridrichen vnd Heinrichen die iünglingsweis v[er]schaiden sein / Conratten Römischer zuo Jherusalem Nappels vnd Sicilien künig hertzog zuo Swaben / het aine[n] ainigen sun gana[n]t Conradin / hertzog zuo Swaben
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 37. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_37.jpg&oldid=- (Version vom 1.8.2018)
