vnd marggraf Albrecht vo[n] österreich ir gemahel hetten nit erben mitainander wan fraw .N. abgeleibt hat / wie sy gehaissen hat / Auch ir begrebnuße setzen die Croniken nicht / graf Albrecht ir gemahel ligt zuo Closternewburg bey sant Lewpolden seinem vater vn[d] fraw Agnesen seiner muoter begraben.
GErdraut ain gotzförchtige fürstin ain tochter herren Lotharien Römischen kaysers vn[d] hertzogs vo[n] Saxsen zuo Praunsweig / die ward durch iren vater / den bemelten kayser Lotharien verheyrat hern Heinrichen dem eltern vnd hoffertigen hertzogen zuo Pairn / vnd nachmal hertzogen vo[n] Saxsen zuo Praunsweig ain sun herren Heinrichs genant Welff grafen von Alltarf in Swaben gelegen bey dem closter Weingarte[n] / der bemelt her heinrich gena[n]t Welff / warde durch hern Heinrichen den vierden Römischen kayser hertzog zuo Pairn gemacht / vn[d] der obgenant her heinrich der elter vnd hoffertig erbet das hertzogtuomb zuo Pairn von her heinrichen Welffen seinem vater / vn[d] das hertzogtuomb zuo Praunsweig von kayser Lotharien seinem sweher Die bestimbt fraw Gerdraut hette mit hertzog heinrichen dem eltern irem gemahel ain sun genant heinrich der iünger vn[d] hoffertig hertzog von Saxsen zuo Praunsweig vn[d] zuo Pairen Westfalen / vnd Enngern hertzogen pfaltzgraffen bey Rein / der bemelt hertzog heinrich der iünger hette drey sün / hern Otten de[n] vierden Römischen kayser / vnd hertzogen von Praunsweig hern Heinrichen pfaltzgrafen bey Rein vnd hern Wilhalmen hertzog heinrich der iünger hette auch ainen vetern seines vatern bruoder genant her Welff der elter / der hett etlich herschaften in Swaben vnd ze Pairn / Er was auch hertzog zuo Tuschkan zuo Spolett vn[d] fürste in Sardinia / der bemelt her Welf der elter hat vil Clöster gestift im land ze swaben / vnd hat die selben nottürftigclich begabet Sant Niclaus gelegen bey Memyng sannt benedicten orden / Weingarten gelegen bey Alttorf auch sant benedicten orden Staingaden dar in weyß münich des ordens von premonstrat / Da selben ist hertzog Welfen des eltern vnd seiner erben begrebnuß / herr Welf der elter hette ain sun hern welfen den iüngern d[er] verwas ain zeit die herschaften seines vater in teütschen vnd welschen lande[n] gelegen / Vnd starb in welschen landen vor seine[m] vater / vnd ligt bey im zuo Staingaden im Closter begraben / Der bemelt hertzog Welff der elter auch hertzog Heinrich der elter vnd hoffertig sein bruoder hetten ain schwester genant Juditha / die ward verheirat herren Fridrichen dem iüngern hertzogen zuo Swabe[n] des geslechts von hohenstauffen / vß der bemelten frawen Juditha vnd herzog Fridrichen dem iüngern irem gemahel ist geporen kayser Fridrich der erst / vo[n] dem selben kayser Fridrichen sein geporn vnd komen vil kayser vnd künig / als eben vnder fraw Agnesen sant Lewpelds gemahel klarlichen begriffen ist / her Welff der iünger het ain swester genant Adelhait / die ward durch hern Welfen den eltern iren vater verheirat herren Fridrichen von Rottenburg ainem mechtigen herren der heilig Sant Conrat pischoff zuo kostnitz ist auch geporen aus der bemelten Welfen geslecht / vnd nach abgang hertzog Heinrichs des eltern vnd hoffertigen / warde die obgenant fraw Gerdraut durch herren Conraten Römischen künig hertzog zuo Swaben vnd zuo Francken / zuo dem andermal verheirat / hern Heinrichen gena[n]t Jochsamergot hertzogen zuo Pairen / vn[d] marggrafen in österreich / der ain bruoder was des bemelten künig Conrats muoterhalben
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter) 1491, Seite 40. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_40.jpg&oldid=- (Version vom 1.8.2018)
