vnd den Zwinger eingeraumbt / vnnd darauff den 20. diß der Schwedisch Obrister Muhl / gewester Commendant / außgezogen ist. Ward vorhero vber zehen Wochen lang blocquirt gehalten.
Nahend bey Chemnitz / liegt das Churfürstliche Schloß Augustusburg / an der Tzschopa / das durch Churfürst Augustum zu Sachsen dermassen erhoben / daß es seines gleichen / ausser Dreßden / fast im Lande nicht hat / wie gedachter Peccenstein part. 2. fol. 16. von seiner Zeit / vnnd vor dem jetzigen Krieg / schreibet.
Ein halbe Meyl vnd Chemnitz liegt Eberstorff / daselbst ein halbes Domb-Stifft / damaln auffgerichtet / nach dem die Junge Hertzogen von Sachsen wider erledigt worden / als sie Cuntz von Kauffung / auß dem Schloß zu Altenburg / wie wir oben bey Altenburg vernommen / entführet hat. Vnd seyn ihre Kleyder / wie auch deß Kohlbrenners / so den von Kauffung gefangen / allda in der Kirchen auffgehangen worden; darbey acht Lateinische Verß vor diesem zu lesen gewest seyn; vnd vielleicht noch.
Eine Statt / vnd Superintendentz / in Meissen / an der Mulda / zwischen den Stätten Grimm / vnd Rochlitz gelegen. Dresserus will daß ihr Nahm auff Teutsch so viel als Finsterwald heisse. Es gehört ein Herrschafft darzu / so vorhin eygene Herren gehabt / vnd Anno 1397. an Marggraff Wilhelmen in Meissen kommen ist. Das schöne Schloß allda ist Anno 1486. erbawet / vnd als solches hernach abgebronnen / wider auffs new / vom Churfürst Ernsten zu Sachsen / auffgeführt worden. In dem nächsten Teutschen Krieg / seyn / neben andern / auch die gemeine Gebäw allhie / darauff gangen. Vnd Anno 1643. im Martio, ist diese Statt / von einer Schwedischen Parthey / vberhuyt / vnd ohnangesehen Schwedische Salvaguardi darinn gelegen / gäntzlich außgeplündert worden. Martinus Boregk / in der Böhmischen Chronic / schreibet / daß die Böhmen / oder Hussiten / An. 1430. die Stätte in Meissen / Colditz / Mögeln / Döbeln / Dalen / Oschatz bey Kolberg 5. Meylen von Leipzig / geplündert / allerley Vnzucht getrieben / die Leuthe erwürgt / die Stätte angesteckt / zerstört / vnd sie zu Staub / vnd Aschen verbrand hetten.
Ein Stättlein nit fern von Gnandstein / vnd Altenburg / so / vor diesem / den Meißnischen Edelleuthen von Einsidel gehört haben solle. Melchias Nehel / in Exegesi Misniae. p. 260. gibt solches Stättlein Kohren / den Lösern auff Pretsch / sampt dem Schloß Salsitz / beede in Meissen gelegen: Hergegen den besagten Einsiedeln / im Jahr 1641. Gnandstein / vnd Lobswitz. Anno 1632. ist Choren / wie auch Siblen / Liechtenstein / Reichenbach / Neukirchen / Oelßnitz / Gnanstein / Penig / vnd andere Oerter durch die Keyserische abgebrant worden.
Zwischen Frondorff / vnd Beichlingen / in Thüringen / gelegen / wird von theils ein Statt genant / so Nehel zum Churfürstlichen Ampt Weissensee referiret; gleichwol hernach saget / daß das Closter Cölleda denen von Wertern gehörig seye.
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 77. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_077.jpg&oldid=- (Version vom 1.8.2018)
_077.jpg&oldid=-){kind=link}
_077.jpg&oldid=3393412){kind=link}