Ein Statt vnd Superintendentz in Meissen / an der Mulda / zwischen Wurtzen vnd Colditz / sampt einem Ampt / darein das Stättlein Laußwitz / oder Laußwig / gehörig. Es hat allhie eine Niderlag von Holtz auff dem Muldenstrom / vnd vor Zeiten grosse Gewerbschafften gehabt / ehe allerhand Wahren Niderlag von dannen auff Leipzig kommen ist. Solle / sampt Hayn / vor die Eltiste Statt in Osterland gehalten werden. Von ihres Nahmens Vrsprung siehe Laurentium Peccenstein in derselben Beschreibung part. 3. Theat. Saxon. fol. 73. seq. Liegt auff einem guten Boden: hat ein Schloß / vnnd die dritte Landschul im Churfürstenthumb Sachsen / welche Churfürst Moritz Anno 1550. allhie in dem Augustiner Closter / vor hundert Gnaden Knaben / auß den Chur-Stätten / gestifftet / vnnd darzu die Einkommen deß Nonnen-Closters Nimpzschen / vor der Statt gelegen / geschlagen hat. Es hat diese Statt viel durch Fewer vnd Wasser / sonderlich Anno 1429. vnd 1573. erlidten. Anno 1429. oder 30. hausseten die Hussiten nach ihrem gefallen vmb Grimma herumb. Anno 1639. handelten allhie die Schwedischen auch gar vbel: es wurden die meisten Häusser geplündert / die Arme Leuthe geprügelt vnd geschlagen. Anno 1644. kamen Statt vnd Schloß wider in deß Churfürsten von Sachsen Gewalt. Es ist aber noch in diesem Jahr der General Major Königsmarck mit den Schwedischen wider darfür angelangt / vnd obwoln sich die 400. darin befindende Sächsische dapffer gewehrt / seyn sie endlich durch einen zum Vortheil gehabten Fuhrt durch die Mulda vbergeschwemmet / vnd entgangen / darauff sich das Schloß / so hernach von den Schwedischen geschleifft worden / auch ergeben hat.
Nennet Nehel p. 253. vnd 258. ein gewestes reiches Closter im Meißnischen Ertzgebürgischen Craysse. Es wird aber / sonder zweiffel / da auch ein Stättlein haben: weilen Laurentius Peccenstein part. 3. Theat. Saxon. fol. 35. vnder den Berg-Stätten auch Grünhain setzet: vnd in der Meißnischen Klagschrifft dieser Ort vnder den abgebrandten Churfürstl. Stätten stehet.
Ein Statt in Nider-Laußnitz / an der Neiß / 5. Meyl von Crossen / zwischen Fürstenberg / vnd Forst / nicht sonders weit von Bobersperg / gelegen / so vorhin zur Cron Böheimb gehört; jetzt aber erblich deß Herren Churfürsten zu Sachsen ist. Nach dem Anno 1434. beyde Procopii in Böheimb vmbkamen / vnnd die Thaboriten verbrandt wurden / so nahme Uladislaus König in Polen / die vertriebene von Adel / vnd auffrührische Böhmen / auff / vnd vnderhielte sie. Durch derselben Hülff ließ er ein groß theil der Marck / vnnd Pommern / vberfallen / einnehmen / viel Leuth erwürgen / viel Flecken plündern / vnd durchs Fewer verderben. Die Statt Guben ward zu Grund eingeäschert / vnd alles darin erwürgt; schreibet Cureus in der Schlesischen Chronic / part. 1. fol. 154. Martinus Boregk / in der Böhmischen Chronic erzehlet f. 446. den Handel also; vor der Statt Guben plünderten sie
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 185. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_185.jpg&oldid=- (Version vom 2.3.2022)
_185.jpg&oldid=-){kind=link}
_185.jpg&oldid=3959760){kind=link}