Seite:Superioris Saxoniae (Merian) 197.jpg

	Matthäus Merian: Topographia Superioris Saxoniae

Cantzler / Herr D. Heinrich Jordan / erschienen / vnd / bey den Münster- vnd Oßnabruggischen General-Friedens-Tractaten / verglichen worden ist / daß der Herr Churfürst zu Brandeburg / die Graffschafft Hohenstein / (so weit / als sie ein Lehen von Halberstatt / vnd in 2. Herrschafften / oder Aemptern / Lor / vnd Klettenberg / vnd etlichen Stätten / sampt Zugehör / bestehe / vnd / nach absterben deß letzten Graven / dem Bistumb einverleibt / vnnd vom Ertzhertzog Leopold Wilhelmen / als Bischoffen zu Halberstatt / possidirt worden /) mit dem gedachten Stifft Halberstatt / bekommen solle. Es kan aber wol seyn / daß die Obere Meynung auch statt hat / vnnd die Herren Graven von Schwartzburg (so wie Nehel sagt / jetzt vnder die Hartz-Graven gerechnet werden /) wie auch die Herren Graven von Stolberg / die vbrige Hohnsteinische Güter / vnnd die Sächsisches Lehen seyn / bekommen haben; wie dann in dem Abschied^{[WS 1]} deß gedachten Reichs-Tags zu Regenspurg / Anno 1641. gehalten / Herren Graff Heinrich Volraden / Grafen zu Stolberg / Königstein / Rütschefort / Werningeroda / Herren zu Epstein / Müntzenberg / vnnd Breyberg / auch der Titul / Gravens zu Honstein / Herren zu Lora / vnd Klettenberg gegeben wird. Also werden daselbst die Herrn Günther / Christian Günther vnd Ludwig Günther / Gebrüder vnd Vettern / 4. Graven deß Reichs / Graven zu Schwartzburg / vnd Honstein / Herren zu Arnstatt / Sondershaussen / Leutenberg / Lora / vnd Klettenberg / tituliret; vnd auch / auff dem Reichstag Anno 1613. die Graven zu Schwartzenburg / vnd Stolberg / wegen der Graffschafft Honstein / durch Gesandte / erschienen seyn. Anno 1371. haben die von Erfurt / Mülhausen / vnd Nordhausen / das obgedachte Berg-Schloß Hohnstein / vergebens belagert / vnd seyn nahend dabey geschlagen worden.

Anno 1631. nach der Leipziger Schlacht / ist Hohnstein von den Schweden eingenommen worden.

Hoyerswerda / oder Hewerswerda.

In der Ober-Laußnitz / Stättlein / Schloß / vnd ziemblich grosse darzu gehörige Herrschafft. Gerardus Mercator setzet dieses Stättlein an die Spree; aber Bartholomaeus Scultetus, ein Laußnitzer von Gorlitz / an die Ilster / oder Elster. Nehel sagt am 283. Blat / gehöre denen von Ponickau / zu / namblich im Jahr 1641. vmbs Jahr 1610. schrieben sich die Herren von Promnitz davon. Anno 1643. setzet die Meißnische Klagschrifft diesen Nahmen auch vnter die Chur-Sächsische abgebrante Stätt; vielleicht darumb / weilen der Zeit Laußnitz dem Herren Churfürsten zu Sachsen erblich gehörig ist. Es wird aber die Brunst vielleicht Anno 1631. geschehen seyn / als die Keyserischen Guben / Damme / Greissen / Gubenforst / Spremberg / vnd dieses Hoyerswerda / in der Laußnitz / ruinirt / vnnd zum theil verbrandt haben; wie in der Frühlings Relation deß Jahrs 1632. stehet.

Ichtershausen.

Ein vornehmes Closter / anderthalb Meylen von Erfurt / an der Gera gelegen / vnnd / sampt zugehörigem Ampt / dem Fürstlich-Sächsischen Hauß Weymar zuständig. In der Thüringischen geschriebenen Chronick stehet / seye Anno 1150. von den Graven von Grumbach / gebawen worden; welches Johan. Bange / in der gedruckten Thüringischen Chronick / bestättigt.

Anmerkungen (Wikisource)

1. Vorlage: Adschied

Empfohlene Zitierweise:
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 197. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_197.jpg&oldid=- (Version vom 2.3.2022)