diese Statt von den Keyserischen erstiegen / die Schwedische darin nidergemacht / vnd mit den Inwohnern / auch den Professorn selbsten / vbel verfahren / vnnd wurd der Schad auff etlich Tonnen Goldes geschätzet.
Anno 1644. erregten die Studenten allhie einen grossen Aufflauff / davon in Tom. 5. Theatri Europaei fol. 291. zu lesen. Obgedachtes Apolda wird vielleicht Apolleda / nicht weit von Weinmar gelegen / seyn / allda sich Anno 1570. am ersten Sontag im Advent / deß Nachts vmb 9. Vhr / ein groß Fewer erhoben / darauff im starcken Winde 41. Höfe neunzehen Ställe / vnd Schewren / abgebrandt worden seyn.
Ein Stättlein / vnnd Superintendentz so eygentlich zur Chur-Sachsen / oder dem Chur-Craysse gehörig ist. Liegt an der Elster / vnderhalb Lochau / oder Annaburg / bey Schweinitz vber / vnd 3. Meylen von Güterbock. Fridericus Taubmannus, in orat. de Hercule Academico, meldet / daß etliche der Meynung / daß dieses der Statt Wittenberg nahend gelegenes Stättlein / durch die Juden also / von Isai oder Iessa, seye genandt worden / welche auch vor Zeiten hierumb gewohnt haben.
Ins gemein Statt Ilm / genant / ein feines Stättlein / an dem Wasser Ilm / in der Graffschafft Schwartzburg gelegen / vnd / sampt seinem Ampt / an die oben bey Jena gedachte Herrschafft Rembda: Item an das Ampt Ehrenstein / stossend. Es hat zu Ilm auch ein Schloß; Item ein feine Kirch / vnd wird ein sonderliche Geschicht erzehlet / so sich allda mit einem Mönch / wie vor Zeiten zu Wien / zugetragen haben solle. Anno 1294. (al. 1286.) fieng Graff Günther zu Schwartzburg / das Jungfrawen Closter zu Ilmen / graw Ordens / an zu bawen / vnd begabet es reichlichen: deß andern Jahrs starb er / vnd ward dahin begraben. Anno 1449. muste Churfürst Friederich von Sächsen vor Ilmen vnverrichter Sachen abziehen; verbrandt aber die Dörffer herumb; stehet in der geschriebenen Thüringischen Chronic Adami Ursini. In dem nächsten Teutschen Krieg wird diese Statt / sonders zweiffels / auch viel außgestanden haben; wie dann allererst im Aprilen deß 46. Jahrs / die Schwedische Haupt-Armee von hinnen auffgebrochen ist.
Ein Stättlein in Thüringen an der Sala / zwischen Orlamund vnd Jena / vnder dz Ampt vnd Herrschafft Leuchtenberg gehörig ist / welche Herrschafft der Fürstlich Sächsisch Calenburgischen Lini zuständig ist. Es gibt viel durchreysens allhie; sonsten wenig von solchem Ort zu finden / als daß in der geschriebenen Thüringischen Chronick Vrsini stehet / daß Anno 1346. die von Erfurt vnd Mühlhaussen Statt vnd Schloß Kala gewonnen / vnnd zerbrochen. In einer andern geschriebnen Chronic wird dieses von Landgraff Friederichen / vnd den Erfurtern / vnd daß es Anno 1345. geschehen / gesagt. Hernach Anno 1391. al. 92. gewonnen die Landgräffische dieses Kala wider / so dazumahl ein Burger von Erfurt / genandt Heinrich von dem Paradeise / Pfandsweiß
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 202. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_202.jpg&oldid=- (Version vom 14.9.2022)
_202.jpg&oldid=-){kind=link}
_202.jpg&oldid=4106297){kind=link}