An der Werra / vnnd den Hessischen Gräntzen / in Thüringen / Statt vnd Ampt / vorhin Fürstl. Sächsischen Eysennachisch; der Zeit aber / der Sächsisch-Weymarischen Lini zuständig. Hat vor Zeiten zur Herrschafft Franckenstein gehört. Es wird allhie Saltz gemacht; davon auch die Statt den Nahmen. Keyser Ott der IV. hat Saltzungen belagert / gewunnen / vnd zerbrochen / wie die Braunschweigische Chronic fol. 192. berichtet. Brouuerus li. 2. Annal. Fuldens. p. 146. sagt / daß die Hertzogen von Sachsen diesen Ort / sampt der Landvogthey[WS 1] Fischberg / Pfandtsweise inne haben. Vnd im 4. Buch am 317. Blat / schreibet er / daß in dem Thüringischen Krieg / vnder dem Keyser Adolpho, der Abbt zu Fulda / Henricus V. die Statt Saltzungen / vnd die Herrschafften Gerstingen / vnnd Franckenstein / an das Stifft Fulda gebracht habe. Ist aber hernach wider davon kommen. Siehe oben Gerstungen.
Anno 1640. lag Herr Ertzhertzog Leopold Wilhelm von Oesterreich / mit theils Volck von der Keyserischen Armee / allhie. Die Thüringisch geschriebene Chronic sagt / daß das Schloß allhie Schneppenburgk heisse: welches dessen Herr / der von Franckenstein / dem gedachten Keyser Adolphen auffgeben / auch ihme / sampt den Seinen geschworen habe.
Statt / Schloß / vnd Ampt in Thüringen / gegen den Graffschafften Manßfeld / vnd Stolberg / vnd dabey das Ampt Röblingen / vnnd die alten Herrschafften / Leinungen / Morungen / vnnd Grüllenburg / gelegen / so alles dem Herren Churfürsten zu Sachsen zuständig ist. Es war Sangerhausen vor Zeiten / eine Graffschafft / so / mit Petersberg / Lecksted / Landsberg / Scopau / Driltze / an Hertzog Magnus zu Braunschwig / mit seiner Gemahlin Agnes / Marggrävin zu Landesberg / wie in der Braunschweigischen Chronick / fol. 233. vnd 237. stehet / kommen ist; wiewol solches Andere dem Hertzog Henrico Moroso zueygnen. Jetztgedachte Chronick saget / am 245. Blat / ferners / daß / als Hertzog Magnus der Jüngere / zugenant der Hertzog mit der Silbernen Ketten / in der Schlacht / wider den Bischoff von Hildeßheim / Anno 1367. gefangen worden / daß er / sich zu lösen / die Herrschafft Landesberg / vnd Sangerhausen / verkauffen müssen; welches dann seinen alten Vatter / obgedachten Hertzog Magnus den Eltern / der solche / vnd andere Güter / wie gesagt / zum Hause Braunschweig gebracht / so sehr betrübt habe / daß er / im folgenden 1368. Jahr / für grossem Kummer / vnd Hertzenleyd / gestorben seye: wiewol diese Chronick hernach / am 413. Blat / auch dieses sagt / daß Anno 1369. gemelter Hertzog Magnus, einen vnnöhtigen Krieg / gegen Hertzog Albrechten zu Mechelburg / angefangen habe / darüber Er dann eingebüst / vnd muste die Pflege Sangerhausen springen: Dann Marggraff Friederich zu Meissen / der Gestreng genant / gab Hertzog Magno Gelt davor / vnd nahm sie zu sich. Vnd dieses sagt gedachte Chronick / an 2. Orten. Mag seyn / daß erstlich Sangerhausen nur verpfändet / hernach aber gar verkaufft worden. Andere setzen das 1370. Jahr / in welchem solcher Orth- an den Landgraven in Thüringen / vnnd Marggraven zu Meissen / kommen; bey welchem Hause er auch biß daher geblieben. Es liegt diese Statt auff einem fruchtbaren Boden / hat ein herrliche Kirch / vnnd stehet in einer geschriebenen Thüringischen Chronick / daß / an S. Vlrichs Kirchen allhie / vber der vntern Thür der
Anmerkungen (Wikisource)
- ↑ Vorlage: Ladvogthey
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 310. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_310.jpg&oldid=- (Version vom 15.9.2022)
_310.jpg&oldid=-){kind=link}
_310.jpg&oldid=4107509){kind=link}