worden ist. Vnter dem Schloß / oder Stammhauß Gleichen / so Keyser Heinrich der Vierdte belagerte / geschach Anno 1089. eine Schlacht / darin der Keyser vnten lag / wie in der geschriebnen Thüringischen Chronic stehet. Die Braunschweigische Chronick beschreibet diese Schlacht fol. 117. seq. auch / sagt aber / daß die am 24. Tag Decemb. deß 1088. Jars / geschehen seye. Vnd damit stimmet auch Sethus Calvisius vber ein.
Diese Statt liegt an der Elb / fünff Meylen oberhalb Wittenberg / in dem Chur-Creysse: vnnd gehöret eine Herrschafft darzu / in welcher die Stättlein / Belgern / vnnd Schilda / die Teutsche Commenthurey Dummitzsch / vnd dz Closter Sitzreroda / jetzt ein Schloß / gelegen seyn. Dresserus sagt / daß diß Wort / in Wendischer Spraach so viel / als eine Lucern bedeute. Vnd vermeint P. Appianus, beym Carolo Stephano, daß Torgau deß Ptolemaei Argelia seye; da doch vor den Wenden keine Stätte in diesem Lande / wie theils wollen / vnd Torgau vmbs Jahr Christi 960. noch ein Dorff / vnd Fischerwohnung solle gewest seyn. Hat vor Zeiten eygene Graven da gehabt / so Torgani Comites seyn genant worden / welchen diese Statt / von den Keysern Adolpho, vnd Alberto, wie besagter Dresserus schreibet / entzogen worden: Nach welchen Marggraff Friederich / so mit den gedachten Keysern Krieg geführt / solche in seinen Gewalt / vnnd auff seine Nachkommen gebracht: wiewol Peccensteinius part. 2. fol. 26. Theatri Saxon. wil / daß noch Anno 1342. zween Graven / Lutholdus, vnnd Iohannes, allhie Hoff gehalten haben.
Michael Boiemus schreibet in dem Leben Hertzog Albrechts von Sachsen / daß Graf Reinhard zu Torgau / an der Elb / Anno 931. der Schlacht (vielleicht Anno 933. mit den Vngarn bey Merseburg) beygewohnt habe. Es seye aber die Statt den Graven von König Adolphen genommen[WS 1] worden / die ein Zeitlang Fürst Waldemars zu Anhalt / bey Regierung Keyser Ludwigs deß Vierten gewesen / die aber hernach wider an Landgraff Friederichen kommen / vnd folgents vnder dem Gewalt der Marggraven zu Meissen geblieben seye. Obgedachter Hertzog Albrecht der Frewdige hat sich sonderlich gern allhie / wegen Lustbarkeit deß Orts / Wälder / Wäyde / Geträyd / Bier / Fische / deß Wassers / Gelegenheit zum Jagen / Weinwachs / gesunden Luffts / auffgehalten. Die Statt liegt in der Ebene / doch also / daß bey welchem Thor man hinein wil / man hinauff zu steigen hat: wie besagter Boiemus erinnert / der auch sagt daß Anno 1538. Irrdine Geschirr / mit Deckeln / voller Todten Beyner außgegraben worden / als Marcus Otho, ein Burger allhie / Weinreben pflantzte.
Es hat da eine Bruck vber die Elb / so erstlich Anno 1491. angelegt worden / so aber nur etliche Steinerne Pfeyler. Hat vor dem jetzigen Krieg ein gute Nahrung / vnd Gewerbschafft / allhie geben; daher die Statt an schönen Gebäwen gewaltig zugenommen; vnd seyn in solcher deßwegen / vnd auch anderer Bequemlichkeit halber / zun öfftern Fürstliche Beylager / vnd Zusammenkunfften angestelt / vnd von den Churfürsten zu Sachsen die meisten Landtäge da gehalten worden; bey welchen die Praelaten auß den dreyen Bistumen / Meissen / Zeitz oder Naumburg / vnnd Merseburg; Item / die Professores von den zweyen Hohen Schulen / Leipzig vnnd Wittenberg; vnnd dann die Graven / Herren / Ritterschafft / vnd Stätte / zu erscheinen pflegen. Es ist von hinnen der weyland fürtreffliche / vnd weitberümbte Medicus, Doctor Georgius Horstius, seeliger Gedächtnuß / bürtig gewesen. Man machet zu Torgau ein herrliches Bier / so man weit verführet. Das Wasser / darauß es gebrawen wird / vnd die Aecker fruchtbar macht / ist schwartz /
Anmerkungen (Wikisource)
- ↑ Vorlage: geonmmen
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 340. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_340.jpg&oldid=- (Version vom 14.9.2022)
_340.jpg&oldid=-){kind=link}
_340.jpg&oldid=4103952){kind=link}