vber die Oder abermals / auff Freyenwald / vnnd ferners nach Neustat / vnnd in Pommern / gangen ist. Anno 1639. Ist seines Volcks wider eine Partey / namlich deß Schwedischen Obristen Leßle Regiment / hieher im Aprilen kommen / vnd an die Statt 20. tausent Reichsthaler Brandschatzung gefordert / sich aber gleichwol bereden lassen / daß es auff 12. tausent kommen / welche Summen / als die gute Leuthe nicht gleich fluchs kondten zusammen bringen / die Schwedischen in dessen den Burgermeister Vögelhaupt / zusampt einem Rathsverwandten Stoll genant / mit sich hinweg genommen haben. Anno 1642. als der newe Schwedische Feldmarschall Torstensohn / auß Schlesien / zuruck vor Leipzig gehen wolte / haben die seinigen alsbalden getrachtet / allhie zu Torgau / vber die Elb zu kommen / vnd als sie diesen Paß erhalten / an welchem sie Nachen / vnnd Kahnen zum Vortheil gefunden; So ist ihr Zug geraden Wegs auff Eulenburg / (dahin sie mit völliger Armee den 16. 26. Octobris gelangt /) vnnd Leipzig gewesen. Kam hernach wider an Chur-Sachsen: aber Anno 1644. nahm der Schwedisch General von Königsmarck / die Statt bald ein: vorm Schloß hat es hart gehalten / biß solches vmb den 13. oder 19. Augusti / auff Gnad vnnd Vngnad sich auch ergeben: welchen Elb-Paß aber vnlangsten die Schwedischen selber wider verlassen haben. Anno 1645. bekamen die Statt / vnnd den 17. 27. Maii das Schloß / die Schwedischen abermals. Was dieser Orth vor Jahren für Vnfäll gehabt / vnd wie Anno 1429. die Vorstätte von den Hussiten abgebrant worden / sie auch Anno 1442. mit allen Vrkunden / biß auff sechs Häuser verbronnen / das kan man bey Andern lesen.
Ein Schloß / vnd Stättlein in Meissen / vnd desselben Ertzgebürgischen Craysse / an dem Flüßlein Tzschopau / (davon auch dieser Orth den Namen hat /) nahend Schelnberg / Annaberg / Chemnitz / Ravenstein / Wolckenstein / vnd Thum / gelegen; so wegen der guten Bieren / die da wachsen / vnnd der herrlichen / Jagden / vnd Viehzucht / so in dieser Gegend vorhin zu finden gewesen / auch deß köstlichen Biers halber / so allhie gemacht wird / beruffen ist. Siehe Laur. Peccenstein part. 2. Theatri Saxon. fol. 17. Anno 1632. haben die Keyserisch-Holckische allhie sehr vbel gehauset: wie auch an vielen andern Orthen. Im Jahr 1634. den 21. Novembris / seyn etliche Sächsische Regiment / von den Keyserischen / allda ruinirt / vnd das Stättlein / biß auff das Schloß / vnd etliche geringe Häußlein / vor dem einen Thor / in die Asche gelegt worden. Der Sechste Theyl deß G. Braunen Stättbuchs gedencket auch dieses Orts / vnder dem Namen Scopa, oder Schuepen / vnd sagt / das Schloß liege gegen dem Wasser auff einem Hügelein / vnd habe einen schönen Thurn / gegen dem Stättlein zu.
Von theils Elbigau genant / in dem Chur-Sächsischen Craysse / ein Stättlein; wie berichtet wird. Die Landtafel setzet es an die Elster / zwischen Hertzberg / vnnd Arenbrück.
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 345. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_345.jpg&oldid=- (Version vom 23.1.2022)
_345.jpg&oldid=-){kind=link}
_345.jpg&oldid=3947430){kind=link}