auch gestorben / durch Churfürst Christian den Ersten / aber hinwieder mit Gelde abgelöset / vnd mit statlichen Gebewden vnnd Fürstlichen Hofflager versehen / wird des Orts wegen sonderer guter Triefften vnd Gelegenheiten eine Pferdestruth gehalten / vnd viel junge Pferde allerhand Art erzogen.
INmassen auch das Schlos Zabelutz hiezuuorn vnd lange Jahr der Pfluge Erbsitz gewesen / ingleichen durch Churfürst Christian Caspar Pflugen jetzo zu Gauernitz mit Gelde abgelöset / vnd zur Fürstlichen Residentz gewidmet / auch mit sondern newen vnd statlichen Stallgebewden versehen / Darunter dann vnd an der Elben das Haus Seuselitz vnd Hirschstein / jetzo den Pistoriussen zustendig / gelegen / welche Heuser in vorzeiten Fürstliche Residentze / inbesondern der Hirschstein gewesen / dann daselbsten / wie in Chronicis gelesen wird / Marggraff Friederich Didrici des Weisen Sohn / Anno 1291. residirt, vnd jhme in Kirschen vergeben worden / vnd zu Suselitz / so hernacher zum Nonnenkloster gewidmet / begraben worden / Sind beyde Heuser jetzo wol erbawet / vnd der Hirschstein derer von Haubitz / Seuselitz aber lange Jahr der Pistoriussen gewesen / inmassen dann Herr Simon Pistorius Churfürstlicher Sächsischer Cantzler vnd Raht / solches zum ersten aus Gnaden erhalten / vnnd auff seinen Stamm gebracht / darbey es auch bißanhero verblieben.
DAselbsten auch jederzeit ein Fürstlicher Residentz gewesen / inmassen der hohe vierkandichte Thurn sampt andern Ruderibus dauon noch zu sehen / Inbesondern Marggraff Friedrich Fortis daselbsten gerne hausirt / auch vor sein fürnembstes Hofflager gehalten.
Lorenz Peckenstein: Theatri Saxonici Ander Theil. Henning Grossen, Jena 1608, Seite 23. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Theatri_Saxonici_Ander_Theil_24.jpg&oldid=- (Version vom 1.8.2018)
