von dem Fluß Sau / im Hertzogthum Crain / vnd davon nicht fern das Schloß gleiches Nahmens / gelegen; so / vor kurtzer Zeit / Freyherrlich Lambergisch gewesen, folgends / durch Heurat / Gräfflich Tattenbachisch worden / vnd vielleicht noch ist.
Ein Landsfürstlich Vnter-Oesterreichischer Marckt / auff halbem Weg / zwischen Wien / vnnd Neustatt / gelegen; davon im Text / p. 50.
Ein schöner / grosser Marckt-Fleck / auch in VnterOesterreich / vnd an der Teya / gelegen; so wol verschlossen ist / wie ein Stättlein / vnd ein Schloß hat. Sihe vnsern Text / p. 51. a.
Ein Marckt-Fleck / auff dem Marchfeld / bey dem Fluß der March / in Vnter-Oesterreich / gelegen / von deme auch an besagtem Ort deß Textes. Crusius in seinen Annalibus Suevicis, part. 3. lib. 11. c. 17. gibt Herren Sigismunden von Landau / Freyherren zum Hauß / vnd Rappottenstein / Keyserlichem Rath / vnd der Vnter-Oesterreichischen Länder Praesidenten / den Titul / auff Ebenthal / vnd Türncrutt; so sonder Zweifel / eben dieses Dürnkrut seyn wird. Weme aber solcher Ort diser zeit gehörig? Davon ermangelt mir gewisser Bericht.
Ein Vnter-Oesterreichisches Stättlein / sechs Meilen von Wien / vnd zwo von der Eysenstatt / vnd an der Leyta / gelegen; davon im Text / p. 14.
Ein beschlossener Marckt-Fleck / an der Traun / in Ober-Oesterreich / vnd ein meil Wegs von Lintz gelegen / dem Bistum Passau gehörig; Davon im Text / p. 51. Der Bäyrische Graff Sichard von Sempt / Keyser Ludwigs deß Dritten (al. IV.) Statthalter im Land Ob der Enß / bawete ein Schloß an der Traun / welches Er / nach seiner Graffschafft in Bäyern / Ebersperg genant / den Traunfluß / vor der wütenden Vngarn Einfall / zu bewahren; sagt Valentin Prevenhueber / in Beschreibung deß Schlosses zu Steyer / p. 120.
An der Schwechat / so allda in die Thonau fällt 2. Meilen vnterhalb Wien / in Vnter-Oesterreich gelegen / ein schöner Marckt-Fleck / sampt einem Keyserlichen Palast / vnd Thiergarten etc. Davon im Text / d. p. 51. Anno 1654. den 23. Julij / N. C. ist / in den Newenzeitungen / eines Lusthauses / Favorita genant / gedacht worden; allda die verwittibte Keyserin / Fraw Eleonora / Ihr Keys. Majest. Herren Ferdinandum III. gastirt habe; vnnd hätte sich der Keyser / von dannen / hernach gen Eberstorff / vnd ferners auff Mannerstorff begeben. Muß also besagtes Lusthauß / Favorita, in dieser Gegend ligen; dann ich sonsten nichts davon bey andern gefunden habe.
Eine im Land Ob der Enß / oder in Ober-Oesterreich / gelegene Statt / vnnd Schloß; davon in vnserm Text / p. 14. vnd daselbst auch von dem ausserhalb der Statt / auff einem Berg gelegnen Schloß Schaunburg / von welchem ein Graven Geschlecht / so nun abgestorben / weyland den Nahmen geführet hat. Es wird Jährlich zu Efferding ein vornehmer Marckt / darzu man vil Schwein bringt / gehalten.
Eine gar alte Vnter-Oesterreichische / vnnd Lands-Fürstliche Statt / an der Schleyntz / vnd nahend dem Manhardsberg / gelegen; von der vnser Text / p. 15. vnd daselbst auch / von dem ein meil Wegs davon gelegenen Marckt-Flecken Pulka / zu lesen.
Matthäus Merian: Topographia Provinciarum Austriacarum. Frankfurter Kunstverein, Frankfurt am Mayn 1679, Seite 396. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Topographia_Austriacarum_(Merian)_396.jpg&oldid=- (Version vom 1.8.2018)
_396.jpg&oldid=-){kind=link}
_396.jpg&oldid=3396338){kind=link}