auffgeben / etc. Als nun beyde Armeen fortgegangen / in Willen / Regenspurg zu entsetzen / kombt ihnen vier Meilen davon Pottschafft / seye schon vbergangen / daher sie sich zurück wider auf Landshuet / vnd Augspurg / begeben; allda sie den sieben vnd zwantzigsten Julij ankamen. Biß hieher dieser. Anno 1646. thate jedermann allhie / auß Forcht vor den Schweden / weichen / vnnd lieffe das Viehe in der Irre herumb. Welches auch von den Leuthen geschehen / ehe die Schweden vnnd Frantzosen / allhie Anno 1648. ankommen seyn; daher diese die Statt einzunehmen keinen sonderlichen Gewalt brauchen dörffen; dieselbe auch eine zimbliche Zeit innen gehabt haben.
Von der Bürger Tapfferkeit / so sie in der Schlacht bey Moßburg wider Herzog Friederichen von Oesterreich Anno 1313. erwiesen / vnnd deßwegen der Statt erlangtem Wappen / ist Brunner. l. 15. Annal. Bojor. pag. 1049. vnnd von ihrer Auffruhr allhie in Anno 1408. Aventinus libro. 8. folio 410. b. von dem Thurnier aber allda gehalten Anno 1439. Munsterus in seiner Welt-Beschreibung; vnnd wie Anno 1546. Käyser Carolus V. sein Kriegsvolck bey dieser Statt wider die Protestierenden gesamblet / Lambertus Hottens. libro 2. vnd von andern hieoben erzehlten Sachen / G. Braun tomo 3. Theatri Urbium, Bertius libro 3. Rerum German. Casp. Ens, in seinen deliciis apodem. pagina 5. die Relationes, vnd verhandene Schrifften / zu lesen. Ein Landshuter Träydmaß / oder Schaff / ist was 2. Menschen deß Jahrs essen mögen.
Diese am Lech / sechs kleine Meylen von Augspurg / vnnd in ObernBäyern gelegene Statt / gehöret vnder die Fürstliche Regierung Mönchen. Hat ein LandtGericht / darinn der Marckt Diessen / vier Clöster / acht Schlösser / eylff Adeliche Sitz / drey vnnd zwantzig Hoffmarchen / ohne die Dörffer / vnnd andere Güter / seyn sollen. Man heisset die Gegendt herumb im Lechthal / darinnen Füessen / Ehrenberg / Lermans / Reuti / das Closter Steingaden / Praemonstratenser Ordens / vnnd andere Orth mehr / liegen / so Theils zu Bäyern / Theils zu Tyrol / Theils dem Stifft Augspurg / Theils andern gehörig seyn. Besagt Landsperg / (so vor Zeiten eygene Grafen gehabt / deren der letzte Heinricus genandt wirdt) ist eine schöne lustige / aber etwas vneben ligende Statt / so in der Höhe ein Schloß hat. Vnd ist das Außsehen von der Jesuiter Kirchen / so auch hoch liget / gar schön. Es ist ihr Collegium, so eines von den ältisten in Teutschland / nit so prächtig / als die jetzigen Newen / erbawet; so Graff Schwickard von Helffenstain / der Pfleger allhie im Schloß gewesen / vnnd sein Gemahlin / ein Gräffin von Hohenzollern / die beyde in der Kirchen begraben ligen / gestifftet haben. Sie halten allhie kein offene Schul / sondern ihr Collegium (darinn gleichwol ein ziemliche Anzahl sich befindet) ist eine Samblung / darauß andern Collegien junge Leuth können zugeschickt werden. Anno 1578. seyn die erste Novicii in dieses Hauß gebracht worden. Das gedachte Schloß soll ein Graff von Within / Nahmens Theodoricus vmbs Jar Christi eylffhundert gebawet haben. Auf dem Platz in der Statt stehet ein schöner Röhr-Kasten / von gutem lautern Brunnen Wasser. In diesem Teutschen Krieg hat solcher Orth / sonderlich Anno 1632. vnd drey- vnd dreyssig viel außgestanden / vnnd ist ein Weil von den Schwedischen / ein Weil von den Bäyerischen eingenommen worden / auch an Theils Orthen vmb die Mawern kommen.
Anno eintausendt sechshundert vnd sechs vnd viertzig / gegen dem Ende deß Octobris, ward diese Statt / von den Schwedischen wider erobert / vnnd ausgeplündert. Vnd hat man selbiges mahl berichtet / daß dieser Orth sich denselben erstlich bald ergeben / hernach aber sie solchen erobern müssen; daher sie ihn dann geplündert / vnnd gebrandtschätzt / vnnd darüber stattliche Beuthen bekommen; aber denselben wider verlassen hätten.
Matthäus Merian: Topographia Bavariae. Frankfurter Kunstverein, Frankfurt am Mayn 1644, Seite 41. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Topographia_Bavariae_(Merian)_068.jpg&oldid=- (Version vom 1.8.2018)
_068.jpg&oldid=-){kind=link}
_068.jpg&oldid=3396456){kind=link}