Christi Geburt 1413. Jahr / hat Hertzog Ludwig / Hertzog in Bäyern / vnd Graff zu Mortany / der Königin zu Franckreich Bruder / angefangen / die Statt Laugingen erweitern zu lassen / Stattmawer zu bessern / vnd auch die Gräbern / darzu den Weg vber das Mos / machen zu lassen / vnnd viel andere nutzliche Bäw an der Statt. Bitt GOtt für seine Seel. Es hatten die H. Pfaltzgraffen vorhin allhie jhr Begräbnuß: Aber nunmehr haben sie solche in der newen Grufft zu Newburg. Pfaltzgraf Wolffgang / der in Franckreich blieben / hat allhie ein Gymnasium auffgericht / welches sein H. Sohn / Pfaltzgraf Philips Ludwig fleissig vnderhalten / vnd hat man bey solcher Schul gelehrte Leuth erzogen / vnd seyn von weiten Orten gar vil / studirens halber / hieher kommen; dahero die Gewerb vnd Kauffmanschafften gewaltig zugenommen / vnd die Statt mit schönen Häusern vnd Gebäwen gezieret / auch dieselbe gar Volckreich vnd vermöglich worden: Aber als folgendts Jh. F. Durchl. H. Pfaltzgraff Wolffgang Wilhelm / etc. die Religion geändert / vnnd in die Regirung kommen / haben sie solche berümbte Schul wider abgeschafft / vnnd die Röm. Cathol. Religion allhie eingeführet; deßwegen viel vornehme vnd wolbegüterte Leuth / sich von dannen begeben; daß dahero / vnd wegen deß jetzigen verderblichen Kriegswesens / so diese Statt / zu vnderschiedlichen malen / wol innen worden / diese schöne unnd wolerbawte Statt / in etwas Abnehmen gerathen. Hat ein Fürstliches Schloß / vnd eine Brücken vber die Thonaw / daran die Mühlen seyn / so man auffziehen kan / wann Schif von Vlm / oder deren Orten herab / kommen. Ist An. 1632. von dem König in Schweden eingenommen / mit Schantzen vmbgeben vnnd fortificirt / doch nicht gäntzlich vollzogen / worden.
Als aber deß Jahrs 1646. sich die Statt den Frantzosen ergeben / so hat man sie hernach zimblich verwahret / vnd mit Realwercken versehen / damit beyde Cronen / Franckreich / vnd Schweden / jederzeit / an der Thonaw / so lang der Teutsche Krieg wären möchte / einen festen Fuß setzen könten.
Ein Dorff / in der Obern Pfaltz / oberhalb Newenmarckt / nahendt dem Closter Castel gelegen / so vmbs Jahr 811. eine Statt solle gewest seyn / deren in Käyser Carls deß Grossen Testament gedacht wird; wie D. L. Wurffbain / relat. 3. pag. 56. berichtet.
Ein weyland schönes ChurFürstliches Schloß / so die Confoederiten Anno 1648. eingeäschert haben sollen / wie in dem 6. Theil deß Theatri Europaei stehet. Es gehört ein Landgericht darzu / so vnder der NiderBäyerischen Regierung / vnd RentAmbt / zu Straubingen ist.
Ein Schloß jenseit deß Lechs gelegen. Anno 1648. haben die verbundene Frantzosen vnd Schweden zu Scheiringen (weyland ein ansehenlich Dorff in Bäyern / daß die Schweden im Jahr 1633. gantz außgeraubet / vnnd die zwo Kirchen / mit den verschlossenen Persohnen / so dahin geflohen waren / verbrandt; wie in dem Augspurgischen oben angezogenem Summarischen Verlauffs Begriff stehet) sich in Schlacht Ordnung gestellt / vnnd den dreyssigsten Septembris Älten Calenders über eine Lauff-Brücke / zwischen den beyden Schlössern Liechtenberg / vnnd Haldenberg / jhren Plunder durch den Lech gehen lassen; die Armee aber ist noch biß gegen Abend / hinder dem Wäldlein / bey dem gedachten Schloß Liechtenberg / in der Schlachtordnung haltend / geblieben; hernach auch über den Lech / in Schwaben / gangen / vnnd selbigen Tags gar spat / zu Schwäbisch München zu logiren kommen / so eine kleine Meil von besagtem Scheiringen gelegen.
Matthäus Merian: Topographia Bavariae. Frankfurter Kunstverein, Frankfurt am Mayn 1644, Seite 43. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Topographia_Bavariae_(Merian)_072.jpg&oldid=- (Version vom 1.8.2018)
_072.jpg&oldid=-){kind=link}
_072.jpg&oldid=3396458){kind=link}