Huni bald gewar wurden / versammelten sich mit den Reüssen / Tartern vnd andern in grosser menig vnd zugen mit hörs krafft in die künigreich vnd land Gotland / Wenden / / Schlauen / vnnd vorder reüssen / die sy bald bezwungen vnd wider einnamen / besatzten sy nach irem gefallen / vnd raubten darnach auff den kaiser vnd des Reichslanden/ theten allenthalben übergrossen schaden mit nom / prand vnd todschlagen / Als aber solcher schad täglich zuonam vnd vnträglich was / beklaget sich der Kaiser desselben gegen allen fürsten / gaistlichen vnd weltlichen / prelaten / grauen / herren / ritter vnd knechten / auch allen stötten vnd ständen des hailigen Römischen reichs / dermassen wie das tirannisch böß vnd vnglaubig volck die Huni jm an seinen erblichen vnd des Reichslanden vnd leüten solchen vnleidlichen abbruch thät vnd schaden zuofügt / darumb er bewegt wurd auß Römischer kaiserlicher macht / bey des Reichs pflichten auff zu manen / vnd ernstlich gebietend bey pflicht vnd ayd / vnd bey allen des Reichs priuilegien / ainem yeden in was wirden oder stand er wär / das sich ain yeder darzuo schicken / vnd in drey monaten den nächsten innhalt seiner Kaiserlichen mandaten in aigner person oder volmächtigen gewalt vnd hauptman beygemelter seiner Maiestat vor Maidenburg im veld erscheinen wölte zuo fuossen vnd zuo ross nach seinem vermögen / vnd als er des gegen seiner Maiestat in künfftig zeit wolt danckberlich geniessen / daselbst sich gegen den feinden Christi vnsers herren gottes alles ernsts zuo gebrauchen / Sein Maiestat wär auch ernstlichs fürnemens mit hilff gottes daselbst vor Maidenburg bey jnen in aigner person mit auffgeworffnem fliegenden des hailigen Reichs paner wider das vnglaubig vnchristenlich böß volck zuo erscheinen. ¶ Als nun solche seiner Kaiß. Maie. mandat allen fürsten vnd herren gaistlichen vnd weltlichen / vnd andern des Reichs verwandten / fürbracht vnd gelesen wurden / waren alle fürsten vnd herrn gaistlich vnd weltlich / stöt vnd gemaind / willig / gehorsam / vnd berait hilf vnd rettung zu thuon / schickten vnd ordneten sich zuo solchem loblichen hörzug mit allen krefften zuo fuoß vnd zu ross / mit geschütz vnd aller notturfft / was zuo solchem gehört vnd notturfft ist / in guotter ordnung / ain yeder nach seinem vermögen / vnd on verziehen.
Georg Rüxner: Von wann vnd vmb welcher vrsachen willen das loblich ritterspil des turniers erdacht. Augspurg, 1518, Seite 04. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Wuersung_Turnierbuch_04.jpg&oldid=- (Version vom 1.8.2018)
