Tuster vnd Leün / vnd kam gen Göttingen also genannt / darumb das er die Gotten zuor selben zeit bezwungen het / Alda behielt er bey jm die fürsten / grauen / freyen / ritter vnnd knecht / deren so vil was das ich glaub vor nie so vil vom adel bey ainander gesehen sey worden. Vnd vmb des willen das sy gehorsamlich erschinen / so eerlich vnd ritterlich an jm vnd dem hailgen Reich gefarn heten / hielt er jnen herrlichen hof vnd allerlay fröwdenspil mit rennen / stechen / baissen / jagen vnd schiessen / vnd mit allem dem was fröwd vnd kurtzweil bringen mag ward nichts nit vnderlassen. Das alles aber den Kaiser irem verdienst nach bedaucht zü wenig sein / besonder gedacht er seinen werden gesten noch mer kurtzweil zu machen / vnd ainen turnier vnd frembd ritterspil zuo zu richten / da er selbs mit jn einreiten vnd turniern wolt / dieweil dem Adel in hochteütschen landen vnd im Reich solchs vnbekant vnd seltzam was / aber in Britania / Gallia / Engelland / vnd derselben ort mer mal geübt vnd in gebrauch / wenn der adel daselbst in kriegen sig erlangt het / alßdenn triumphierten vnd turnierten sy / zuo offenbarem anzaigen der freüden vnd überwindung / Was demnach Kai. Mai. fleissig betrachten vnd nachgedencken dieweil souil außerleßner fürsten vnd herrn / ritter vnd knecht vom adel versamelt nie mer bey ainander gesehen warn worden / ain sogethon eerlich ritterspil vnd turniern an zu schicken. Solich sein fürnemen er den fürsten fürhielt / darzuo sy jm mit gantz genaigtem willen zuo verhelffen zuosagten / Wiewol ir auch zum tail vil was die lieber anhaims geriten wärn / wann sich die raiß biß in das drit jar verlengt het / nochdann so beliben gemainlichen all fürsten vnd namhafft herrn vnd der adel verharren beyainander dem neüen ritterspil veruolg zu thuon. Vnd also ward der turnier mit radt Kaiserlicher Maiestat vnd gemainer fürsten fürgenommen / vnd rat geschlagen besonderlich mit den vier fürsten des Reichs / Pfaltzgrauen bey Rein / hertzogen auß Francken / hertzogen in Schwaben / vnd hertzogen in Bairn als die hauptleüt des hailigen Reichs / das ir yetlicher zum radtschlag geben solt drey mann / so wolt Kai. Mai. auch drey mann darzuo verordnen / dise fünfftzehen mann solten nider gesetzt werden / den turnir anschlagen / schicken vnd ordnen vnuerzogelich.
Georg Rüxner: Von wann vnd vmb welcher vrsachen willen das loblich ritterspil des turniers erdacht. Augspurg, 1518, Seite 09. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Wuersung_Turnierbuch_09.jpg&oldid=- (Version vom 29.5.2018)
