Seite:Wuersung Turnierbuch 15.jpg

	Georg Rüxner: Von wann vnd vmb welcher vrsachen willen das loblich ritterspil des turniers erdacht

allem adel zu^o wirden / vnnd waiß dem selbigen kains nutzbarlicher vnd oblicher sein / wann wölcher von adel geborn ist der wider das hailig Römisch reich / wider Kai. Mai. gebot fräuenlich thu^ot vnd verachtlich handelt / haimlich oder offenlich / mit worten / wercken oder gethaten / das dieselben in offnem turnier vor allermenigklich gestrafft vnd geschlagen werden sollen nach inhalt des turniers freyhait vnd gerechtigkait / Soliches erkenn ich für das ander stuck.

¶ Das drit stuck setzt ain hertzog auss Francken

DArnach was es an dem Hertzogen auß Francken sein turnier stuck zu setzen / der sprach / Gnädigster Kaiser seyt das ich von ewer maiestat darzu^o erfordert bin / wil ich meinn fleiß fürkeren das drit stuck zu setzen gott zu^o lob / dem hailigen Reich zu^o nutz / gemainem adel zu^o warnung / sich von allen vneern zu^o enthalten: vnd erkenn zu^o meinem tail / wölcher von adel geboren vnd herkommen sey / der seinn oberheren verradt oder feldflüchtig von jm wirt / auch die seine bürgen seind on recht vnd vnuerschuldt / vnbewart seiner eern vmbbrächt / das derselb vor allermenigklich sol geschlagen vnd gestrafft werden nach außweysung des turniers gerechtigkait.

¶ Das IIII. stuck setzt ain hertzog von Swaben.

VNd als ain hertzog auß Franncken sein red volbracht het / sprach der Kaiser hertzog Fridrichen von Schwaben zu^o / daz er das vierdt turnierstuck ordnen solt: des er sich zu thu^on gehorsamlich erbot / vnd sprach / Allergnädigster herr so dann ewer Kai. Mai. mir freyhait gibt das vierd stuck zu^o setzen / waiß ich kains das got dem herrn loblicher / dem hailigen Reich nutzbarlicher / vnd gemainem adel eerlicher sey / zu^o wirden Maria der mu^oter gotes / allen hailigen frawen / junckfrawen vnd wittiben / wölicher der wär von adel geboren vnd herkommen der frawen oder junckfrawen enteert oder schwecht / dieselben schmächt mit worten oder wercken / vnbewart seiner eern / der sol vor meniglich in offnem turnier für ainn frawen vnd junckfrawen schender bekant / gestrafft vnd geschlagen werden nach inhalt des turniers außweysung vnd gerechtigkait / setz ich mit willen Kaiserlicher maiestat für das vierd stuck

Empfohlene Zitierweise:
Georg Rüxner: Von wann vnd vmb welcher vrsachen willen das loblich ritterspil des turniers erdacht. Augspurg, 1518, Seite 15. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Wuersung_Turnierbuch_15.jpg&oldid=- (Version vom 1.8.2018)