Sich froͤit der luft dc wasser

Sich froͤit der luft dc wasser·
mit fúre· dú erde vnd dú zit·
iung man des bist dv lasser·
sin stúre dir alles dc git·
lieb ist wilder creature zwein vnd zwein gemeine·
dv bist der werden minne liebes ane vnd eine·
minne ist vnstete bi
swa sich der rose erzeiget·
da reiget· der dorn an dc zwi·

Dú zit mit froͤiden buͤze·
der ǒwe· dc si trurig wc·
meie die heide gruͤsse·
in tǒwe stet blv̊men vnd gras·
wis bla gel brvn gruͤne rot der anger stet geblvͤmet·
da bi sich div linde breit ir gruͤnen lǒbes ruͤmet·
doͤnet dú nahtegal·
troͤschel lerche vnd kalander·
vnd ander· gefúgel svͤssen schal·

Ich wil die minne strafen·
si swachet· ir eren ein teil^{[WS 1]}·
swa si wol solde slafen·
da wachet· si vf ir vnheil·
ich tv̊n ir mit rede gewalt· dc ist ir wider winne·
si vert vsserthalb der mâsse vnd ist genant vnminne·
minne ist vnstete vri·
swa sich dú rose erzeiget·
da reiget· der dorn an das zwi·

Schimpfwort schimpfliches lache·
dú minne·
vúr gv̊t von dir nimet·
niemans in schimpfe swachen·
der sinne· die minne gezimet·
minne git zwei lieben einen mv̊t vnd eine trúwe·
wand es ielich varwe ist gelher in ir blvͤnden núwe·
lieb wirt niht anders leit·
golt swinet an der hende·
selh ende· der minne ist bereit·

Anmerkungen (Wikisource)

1. Vorlage: tel.