Svmer wūne
[88r]
Svmer wūne· ſo dv dine liehtē tage erglentzen wilt·
wc kan in der welte danne húgelicher ſin·
Vn̄ dú ſvnne· dꝛinget liehten meien dvr der gruͤnen ſchilt·
der von lobe ſchatten birt dien kleinē vogellin·
dv́ dar vnder ſingēt froͤideriche doͤne·
ſo gedenke ich heia hei wer hie bi mir dú ſchoͤne·
der ich vil gedienet han bi miner zit ſo wurde ich fro·
ia richer got vō himele wan gienge es húre alſo·
Die gedanke· nach der lieben hoͤhent dike mir den mv̊t·
toꝛen reht iſt vil gewúnſchen des er niht enhat·
dc ſint kranke· froͤide bar vn̄ ſint doch vnderwilent gv̊t·
manic man gedenket dike dar ſin herze ſtat·
ich gedenke dike vn̄ wúnſche dc dú ſvͤſſe·
minen ſenden kvmber den ich dur ſi lide bvͤſſe·
der ich vil gedienet han bi miner zit ſo wurde ich fro·
ia richer got vō himele wan gienge es húre alſo·[WS 1]
Towig roſe· gegē der ſvnnē dú ſich vſ ir belgelin·
hat zerſpꝛeitet ſtāt die wiſſen lilien nahe bi·
dú vil loſe· hat mit gvͤte dirre zweier blv̊men ſchin·
an ir libe vn̄ iſt aller miſſewende vꝛi·
wan mac ſi wol nennen zv̊ dem wūſche gegen dē grale·
ſo gedenke ich alles lieb wer hie dú liehte gemale·
Der ich vil gedienet han bi miner zit ſo wurde ich fro·
ia richer got vō himele wan gienge es húre alſo·[WS 2]
Frowe ich bin· din eigen diener iem̾ ſit da her geweſen·
ſit ich die vil mī ſit da her geweſen·
ſit ich die vil mīneklichē ſach ſo wol geſtalt·
miner ſin· der hat ir lip voꝛ allen vꝛowē vs erleſē·
es enwart an tvgendē nien hein wib zv̊ zir gezalt·
liese ſi mich dienſtes vn̄ trúwen noch genieſſen·
der mich beider gegen der lieben niemer wil v̾dꝛieſſen·
Der ich vil gedienet han bi miner zit ſo wurde ich fro·
ia richer got vō himele wan gienge es húre alſo·[WS 3]
Dv́ vil reine· ſeldebere der ich eigen diener bin·
dú iſt gar an allē wandel ganzer tvgende vol·
wā ein kleine· das beſweret leider dike mir den ſin·
ſi iſt gegē miner bet ze ſtrenge dc bevinde ich wol·
nv beginnet manig̾ ſpꝛechen dc tv̊t ſi mit eren·
dc ſint ſchalke dar an ſol dú liebe ſich niht keren·
Der ich vil gedienet han bi miner zit ſo wurde ich fro·
ia richer got vō himele wan gienge es húre alſo·[WS 4]