Topographia Bavariae: Weiden

Weiden.

Ist eine Statt in der Obern Pfaltz / zwischen Newstättl vnd Pfreimbd / wann man von Eger nach Regenspurg will / bey der Nab gelegen / zimlich groß / vnd verwahret. Anno 1634. im Jan. hat sie Hertzog Bernhard von Sachsen Weymar belägern lassen / der Keyserisch Commendant darinn / hat starck Fewer herauß geben / auch die vnter vnd ober Vorstatt weggebrant / vnd etlich Ort in der Statt angezündt; also daß viel Städel vnd Häuser darauf gangen seyn; gleichwol kundte das Fewer / weil es Windstill / seinem belieben nach / den effect nicht erreichen / vnd sein die Schwedischen dem Ding vorkommen / die Vorstatt / wie auch den Spital / den die Käys. verbrennen wollen / eingenommen; vnd als sie auß solchem den 30. Jan. die Bresse geschossen / vnd es zum Sturm kommen solte / haben die Käyserische 3. stund lang schwerlich accordirt; aber doch ihren Abzug / auf Pilsen zu / so gut sie möchten / erhalten / ist ihnen aber vnterwegs nicht zum besten ergangen / vnd seyn irer vff die hundert herüber gefallen. Es ist solche Statt folgends in Schwed. Händen geblieben / biß dieselbe An. 1635. die Bäyerische eingenommen / vnd vmb den Anfang deß 1641. Jahrs / bey Anzug deß Bannierischen Volcks besser / vnd da beynebens auch etliche dort herumb / vnd vmb Neumarckt vnd Amberg / ligende Berghäuser in etwas besetzet / die allhie zu Weyden noch gestandene Vorstatt Mauren / Rundelen / vnd Städeln abtragen lassen. War vor disem ein Gemein Statt vnd Ambt / daran nicht allein die Herren Pfaltzgrafen Newburgischer Lini / sondern auch ChurPfaltz / Theil gehabt haben sollen. Besiehe vnden im Beschluß Parckstein. Herr Wolffgang Wilhelm / Pfaltzgraf / hat das / was Chur-Pfaltz an Weiden gehörte / außgebetten / wie newlich berichtet worden ist. An. 48 kam sie abermals in Schwed. Hand / vnd in deß General Leuten Ambts / H. Hanß Christophen von Königsmarck / Gewalt; der darauff das Evangelisch Religions Exercitium allhie wider angestellt / vnd die Statt trefflich befestigen lassen. Er besetzte auch Nabburg / vnd Schwandorff: vnnd geriethen das Schloß Falckenberg / vnd das Ambt DürschenReut / deßgleichen in seine hände; davon das Schloß Falckenberg; wie oben bey Waldeck Bericht geschihet / An. 49. wider abgetretten worden ist: Aber die Statt Weiden haben die Schwedischen noch länger behalten / biß zu Eingang deß 53. Jars / solche Statt / sampt dem Hauß Parckstein / endlich evacuirt, vnnd beyderseits Soldaten abgeführt worden; wie in der Frühlings Relation desselben Jahrs stehet. Vnter dessen seyn im besagten 49. Jahr / die Friedens-Executions Herren Commissarien auch hieher kommen / vmb die Execution allda vorzunehmen. Vnd ob zwar die Herren Geistlichen sehr vngern daran kommen; so haben sie doch pariren müssen; wie im 6. tomo Theatri Europaei gesagt wird.