Vil reinú mv̊t̾ vn̄ maget
[353v]
Jn dem don· Der eren ſpiegel iſt dv́ ſchame·
Vil reinú mv̊t̾ vn̄ maget·
roſe ane ſv́ndē doꝛn·
vō dir dú ſchꝛift gros wūder ſaget·
wir warē alle nah v̾loꝛn·
do half vns din kúſche vn̄ din gvͤte vō d̾ ſw̾en not·
wir ſin in arger zit betaget·
ſenfte vns dē gottes zoꝛn·
din ſvn dir niem̾ niht v̾ſaget·
d̾ helle wirt hat des geſwoꝛn·
er welle vns v̾teilē in den eweklichē w̾ndē tot·
bitte got vn̄ gebúte dē eingeboꝛnē ſvne din·
dc er vns hie niht laſſe alſvs v̾weiſet ſin·
dvr ſolh̾ froͤide kv́nfte·
die dir zeſchine bꝛahte ſiner vrſtende ſigenv́nfte·
zetode d̾ dē zwilhen tot an vns zetode ſlv̊g·
vn̄ ab vnſ tẘg·
ſv́ndē vngefv̊g·
vn̄ ſin mēſcheit vúr vns trůg·
des wc der creatúre vō ir ſchoͤpfer me dāne genv̊g·
dc er ſich ze martere an dc frone krúze fúr vns bot·
Es wont ein wurn in einē hol·
d̾ ſtiftet manig moꝛt·
gar ark mag ich in nēnē wol·
er ruͤret bein vn̄ ſchepfet woꝛt·
er iſt ſnabelreſer danne ein viper nat̾ mvge ſîn·
ſin ſwanz[WS 1] d̾ iſt gelippes vol·
gar giftig iſt ſin oꝛt·
da voꝛ ſich gv̊t mā hvͤtē ſol·
er meinet her vn̄ tútet doꝛt·
wilēt in dc waſſer iſt ſin gir vn̄ wilēt in dē win·
vnd̾ tvſent hant ir niht wā einē namē·
der wiſe adam d̾ kvnde ir[WS 2] einē nie gezamē·
do er viel in ſchulde·
dē ſelbē wurme giht ǒch ſalomō grôſſer vndulde·
david flv̊chte im vn̄ dar zv̊ manig wiſer [354r] man·
ſit niemā kan·
im gebindē an·
ſo binde in doch der gottes ban·
dar zv̊ ſchende in d̾ mit im vs fronen himelriche endꝛan·
ich weis wol dc ſich an in w̾dent meſtent cleinú wúrmelin·
Der eren ſpiegel iſt dú ſcham·
ſw̾ ſich dar inne erſiht·
d̾ wirt vnzeme bliken[WS 3] gram·
dú ſchame hat mit kúſche ir pfliht·
dú ſchame iſt argē woꝛtē vigēt vntrv́wē has vnſtetē flůch·
ſcham iſt eī tvgent dv́ mānes nam[WS 4]
gegē frowē pꝛiſes giht·
dú reinē wib tv̊nt mā alſam
ir beider lieb mit ſchame geſchiht·
ſchame get[WS 5] edelē geſteine voꝛ vn̄ túret bas dāne ſidin tv̊ch·
ſchame iſt mit beſcheidēheit d̾ w̾den mīne bi·
dú ſcham ī eren gartē iſt ein blvͤndes zwi·
dú ſchame iſt erē ſchilt·
dú ſcham alſam ein reines kint in ſchon̾ frowē ſchozē ſpilt·
ſchame zieret reinú wib vn̄ wirdet edelē man·
ſchame kan·
leidē vf dē ban·
da nie ſchandē trit kam an·
ſw̾ ſchame mīnet dē bkret in ſchandē dieneſt ſeltē han·
ſchā iſt ein dú hohſte tugēt ſagent vns die meiſter vn̄ dú bůch·
Der kúnig Nabuchodonoſoꝛ·
ī einē trǒme ſach·
ein bilde hohe ſtan
dc hǒbt wc gvldin als er iach·
ſilberin arme vn̄ bꝛvſt ein teil êr vn̄ iſenin·
die fuͤſſe warē ſchirbin hoꝛ·
die ſit dc iſen bꝛach·
d̾ trǒn gieng ſinē ſinnē voꝛ·
betúteklich ein wſſage ſp̋ch·
kúnig d̾ trǒn iſt nv bi dir vn̄ wirt nach dir der w̾lte ſchin·
kúnig dv d̾ w̾ndē bildeſ hǒbet golt·
nach dir ein riche bꝛīget ſilb̾inē ſolt·
ein eris dar nach kvmt·
dar nach dc iſen erin bꝛingt vn̄ ſchirbin fv̊s zeſtvkē dꝛvmt·
hie bi ſo mvgt ir m̾ken wie es in d̾ w̾lde ſte·
dc galt wc ê·
ſilb̾ dar nach me·
nv habē wir ein iſenin we·
dc witwē vn̄ weiſen machet māgen iem̾lichē ſchꝛê·
deſ ſvln ſich die fúrſtē ſchamē ſvnt ſi ſchirbī fvͤſſe ſin·
Swel fvchs ſich ſines mvſens ſchamt·
d̾ mv̊ſ v̾derbē doch·
dv́ mvs hat ein vil ſwaches amt·
ſi vert in eines froͤmdeſ loch·
ſiech̾ arzat armer wiſſage· leid̾ gaſt die ſint vnw̾t·
ſw̾ wildē mard̾ ī ſchôzē zamt·
vn̄ leit dē lewē ein ioch·
ob im ſin hāt da niht erlamt·
ſo mag er doch wol ſpꝛechē och·
ohſen krone zimt niht wol noch ī des zagē hant ein gv̊t ſw̾t·
mv́nches tanzē nv̄nē húbeſcheit vn̄ des affen zagel·
des meiē rife vn̄ in dē ǒgeſtē ein ſtarker hagel·
mir ſeltē wol behaget·
vs richē mānes mv̄de lvge vn̄ ſwa dē b̾n ein eichoꝛn iagt·
mich wūdert ermv́ hohvart vn̄ iſt alt̾ mā vnwiſ·
d̾ w̾lte pꝛis·
ſmilzet ſam ein iſ·
liebē kinde iſt gv̊t ein ris·
ſw̾ ane voꝛhte wahſet der mv̊ſ ſvnd̾ ere w̾dē gris·
bi diſē m̾en ſtât es húre michels boͤſer dāne vert·
Ein ieglich mēſche mv̊s v̾zagē·
an froͤidē ſo d̾ tot·
begīnet ī ſin h̾ze iagen·
vn̄ es gat an die ſtarkē not·
vn̄ er[WS 6] mit dē armē libe hat vil iem̾liches ſpil·
die richen ſvn die armē klagē·
wā es in got gebot·
vn̄ ſvln ir armv̊t helfen tragē·
vn̄ mit in teilē gerne ir bꝛôt·
m̾kent wol es krumbet vꝛú ſwc zeinē hâggē w̾dē wil·
vil manig̾ wenet wîſe ſin der iſt leid̾ krumb·
da vō ſint dú reht ī allē landē krumb·
die wile es alſo gât·
ein mā der ber ſin liebes kint· die wile vnz es ſich beren lât·
ſwēne es vs d̾ hitze kvmt vn̄ es iſt vngeb̾t·
ſo iſt ſin gev̾t
gewahſen lihte zehert·
dc es ſich dē berē wert·
ſo wirt v̾ſvmet ſwc mā dꝛoͤit od̾ vf ſinē rugge gert·
des ſiht mā ī genv̊gē ſtettē úbeler ſchalke vil·
Singe ich dien lútē minú leit·
ſo wil d̾ erſte dc·
wie dietrich vō b̾ne ſchiet·
d̾ and̾ wa kúnig ruͤther ſas·
d̾ dꝛitte wil d̾ rú̂ſſen ſtvrn ſo wil d̾ vierde eggeharteſ not·
der fúnfte wē kriemhilt v̾riet·
dem ſehſtē tete bc·
war komē ſi d̾ wilzzē diet·
d̾ ſibēde wolde eteſwas·
heīmē ald herē wichē ſturn ſigfrides ald h̾n eggē tot·
ſo wil d̾ ahtode da bi niht wā húbſchē mīne ſang·
dē nv̊ndē iſt dv́ wile bi den allē lang·
d̾ zehēde enweis wie·
nv ſuſt nv ſo nv dan nv dar nv hin nv her nv doꝛt nv hie·
da bi hete māg̾ g̾ne d̾ ýmlvnge hoꝛt·
d̾ wigt mī woꝛt·
ring̾ dāne ein oꝛt·
des mv̊t iſt ī ſchaze v̾ſchoꝛt·
ſvs get mī ſang ī māges oꝛn als d̾ mit blîge [354v] ī marmel boꝛt·
ſvs ſinge ich vn̄ ſage ú des iv niht bi mir der kv́nig embôt·
Als des lewen welf geboꝛn·
w̾dēt ſo ſint ſi tot·
vil grimmeklich ſo iſt ſin zoꝛn·
vil iem̾lich ſo iſt ſin not·
vil lute er ī ir oꝛe ſchꝛît des w̾dent wid̾ lebendig ſie·
d̾ helfant waſſer hat erkoꝛn·
dis wūd̾ got gebot·
ſin fruht w̾e and̾s gar v̾loꝛn·
d̾ ſtrus mit ſinē ǒgen rot·
dꝛîe tage an ſinú eiger ſiht des w̾dent us gebꝛuͤtet die·
d̾ adlar lat ſin kinder in die ſvnnē ſehē·
dú des niht tv̊nt da mvgt ir michel wund̾ ſpehē·
dú lat er vallē nid̾·
der fenix[WS 7] d̾ v̾bꝛēnet ſich vn̄ wirt lebende nach dem vúre wider·
vō liebe er krimet ǒch d̾ pellícanꝰ ſinú kint·
ſwēne er ſi vint·
tot daſ niht ein wint·
ſo tůt er rehte als er ſi blint·
er nimt ſinſ h̾zen blv̊t vn̄ machet dc ſi wid̾ lebendig ſint·
mit d̾ hezeichenv̄ge ſin wir vō d̾ helle erloͤſet hie·
Ich ſvnge ein biſpel od̾ ein ſpel·
ein warheit oder ein luge·
ich ſvnge ǒch wol wie titerel·
die templeiſe bi dē grale zuge·
wie ſuͤze iſt ſýrenē don vn̄ ark des cocatrillen zoꝛn·
ich ſvnge ǒch dꝛaken fúrin kel·
vn̄ wie d̾ grife fluge·
wie ſich des ſalamād̾s vel·
ī heiſſem fúre ſtrahte vn̄ ſmvge·
vn̄ wie ſich teilte zchim̾en lib vn̄ wie dú vipper wirt geboꝛn·
ich ſvnge ǒch wol wie ſinú eiger bꝛuͤtē kan d̾ ſtrus·
ich ſvnge ǒch wol wie ſich d̾ fenix ivnget vs·
ich ſvnge ǒch wie d̾ lit·
d̾ manigē in d̾ wūd̾ burg v̾ſlundē hat dur ſinē git·
ein wūd̾ wont dē hove bi mit wūd̾lichē ſittē·
mit pfawē ſchꝛittē·
vn̄ mit mēſchē trittē·
kan es lagen loſen bittē·
es hat mit ſiner zvngē wafen māges h̾rē mv̊t v̾ſnittē·
dē ka ich geſingē niht min rede iſt an ime gar v̾loꝛn·
Wer kan dē lútē lúge erw̾n·
lug iſt ein alt̾ hoꝛt·
mit lvge mv̊s ſich vil maniger nern·
lvg hat geſtiftet māgē moꝛt·
lvg hat einē argē vatt̾ lug hat tvmb̾ kinde vil·
lvg lat ſich als ein weich wahſ bern·
lug hat vil ſvͤſſe woꝛt·
mit lvge kā manig̾ eide ſw̾n·
lug hat vil manig ſpitzig oꝛt·
lvg iſt eī vil ſnelles úbel lug iſt d̾ boͤſen geiſte ſpil·
lug iſt in dē waſſer lug iſt komē vb̾ mer·
lug hat gegē d̾ warheit ein vil bꝛeites her·
lvg kvmt an babeſtes tv̊r·
lug wont ǒch ſchonē frowē bi mā treit ǒch lúge dē fúrſtē vúr·
lug iſt ī doͤꝛfern vn̄ in bv́rgē lvg iſt in d̾ ſtat·
lug hat dē pfat·
dē d̾ tievel trat·
do er adamē eſſen bat·
dē apfel lug git māgē ſchach lug ſpilt vf manigeſ toꝛē mat·
lvg hat ſam vn̄ ein krut des wurze niht erdoꝛren wil·