Winter dv wilt aber vil verderben (Mit aufgelösten Abbreviaturen)

Winter dv wilt aber vil verderben·
liehter^{[WS 1]} blv̊men die doch schoͤne waren·
vnd ein wib dv́ wil mich froͤide ersterben·
der ich pflag in froͤiderichen iaren·
dú gv̊te dv́ gv̊te dv́ gv̊te dú reine·
die ich mit ganzen trúwen iemeR meine·

Sit dv́ welt an froͤiden wil verswinden·
so moͤht ich wol lassen vngesvngen·
wan ein wib des war ich wolte erwinden·
nach der ie min herze hat gervngen·
dú gv̊te dv́ gv̊te dv́ gv̊te dú reine·
die ich mit ganzen trúwen iemeR meine·^{[WS 2]}

Wol gebaren vnd lieplich lachen·
lieplich bliken dar vnd dan mit gvͤte·
dc kan dv́ vil gv̊te wol gemachen·
gegen ir troste froͤit sich min gemvͤte·
dú gv̊te dv́ gv̊te dv́ gv̊te dú reine·
die ich mit ganzen trúwen iemeR meine·^{[WS 3]}

Wer gesach ie von so rotem mvnde·
minneklicher lachen vnd grvͤssen·
den kvst ich vil gerne ob si mirs gvnde·
dv́ mir minen kvmber kan gebvͤssen·
Dv́ gv̊te dv́ gv̊te dv́ gv̊te dú reine·
die ich mit ganzen trúwen iemeR meine·^{[WS 4]}

Anmerkungen (Wikisource)

1. Vorlage: liehte.
2. Vorlage: div gvote dú gv̊te·
3. Vorlage: Dú gv̊te·
4. Vorlage: Dv́ gv̊·