| 32 | Ældre |
þau vitni er eigi scolo andvitni a mote koma. þat er heimstemnu vitni. oc þingstefnu vitni. oc kvoðu vitni. oc nauðsynia vitni. oc forsagnar vitni. oc þau vitni er menn bera um deilld manna at oldrhusi. En ef maðr krefr mann fiar. þa ma hann sva krofu veria. at kveðast þa skulld golldet hava. oc nemner vatta sina þa er við þat varo. Nu ef vattar ero innan fylkis. þa scal skapa þeim leiðarlengd til. En ef vattar ero utan fylkis. þa scal gera þeim lagastefnu at þeir kome þar oc bere slict vitni sem þeir við varo. Nu bera þeir sva vitni at þeir við þat varo er hann lauc skulld þeirri allre sér af hende. þa hever hann krofu rétt varða. þat heitir alyctar vitni. þar scal oc ecki andvitni amote koma. En ef þeir koma eigi. þa er han seccr a krofu þeirri. Nefgilldismenn. æða baugilldismenn. æða namagar megu eigi bera vitni með manne. nema þeir se baðom iamskylldir.
Taca megu tveir við eins vitni ef sa er frumváttr er við var. þa verðr þat vitni at fullu sva sem þeir have aller við verit.
60 Nv föra menn andvitni amote. þa scolo þeir auca einum vatt. þa ero þeir sköcvattar er fyrri baro. En ef þeir bera aller iammarger. þa ero þeir scröcvattar er eftre baro. oc bera alldri vitni of slict mal siðan. oc böta .iij. morcom kononge hverr þeirra.
61 Nu leiðir maðr þræll sinn i kirkiu. æða a kistu setr. oc gefr frælsi. Nu ef hann gefr skattalaust oc skullda. þa þarf sa eigi at gera frælsis ol sitt. ne engi sa maðr er frials fellr a iorð. þa scal hann raða kaupum sinum oc kvánfongum. þo scal hann væra i þyrmslum við skapdrotten sinn. sva sem hinn er verðr reiðir. Nu gefr maðr þræle sinum þeim frælsi er verð reiðir æða ambotto. frials er hverr er frælsi er gevet. ef þa gefr er geva a. Nu ferr þræll frials mannz forom .xx. vetr. æða .xx. vetrum lengr. oc illir engi maðr farar hans. ne kaup hans. ne kvanfong. hvárt sem hann ferr utanfylkis. æða innanfylkis. þa er hann frials. ef hann vill frials kallasc. Sa maðr er konongr gefr frælsi. hann scal eigi gera frælsis ol sitt. oc sa annarr er fyrr er frælsi gevet er hann have .iij. netr hinar helgu. oc föddr upp siðan skulldlaus. Nu reiðir þræll æða ambott verðaura sina. þa scal þau til kirkiu föra oc leggia boc a hofuð þeim. oc geva frelsi. Nu scal hann þar vinna .xii. manaðr firi skapdrotne sinum. En ef hanom er sva frælsi gevet at efter stendr halft verð hans. æða meira. þa þo at hann söke þat með hoggum er efter stendr þar a ecki konongr a.
- Jvfr. Cap.60 F. XIII. 24. 25. Cap. 61. F. IX. 12.
