zwo Meilen von dem grossen / hohen / vnd weitbekanten Berge / dem Brocken / nach Süden werts / Sie hebet sich an in einem Thal oder Grunde / nach dem Westen / vnd ist zu beyden seiten der Berge hinauff / biß vff die ebene gebawet / woselbst die Kirche stehet / genant zur H. Dreyfaltigkeit. Es ist daselbst vor 80. Jahren / wie es die Herren Grafen von Honstein gehabt / ein sehr reiches vnd löblich Bergwerck / vnd zur selben Zeit die Bergstatt in ihrem besten flor gewesen / zu welcher Zeit auch daselbsten mancherley reich Ertz gebrochen / wie vff den alten Zechen noch zu spüren / als rothgülden Ertz / braun rothgülden / Glaßertz / härig Ertz / ist wie ein krauß Haar / vnd fast gediegen Silber / Item / Kublet / Eisenschoß / Bleichschweiff / Glantz / etc. Vff einer Zechen / S. Georgen genant / hat ein Kux 500. Reichsthaler gegolten / vnd Außbeuthe geben in einem Quartal 68. Reichsthaler.
Vff einer andern fürnehmen Zeche / genant die Gnade Gottes / hat man in dem Silbergange ein Bergmännlin funden / eines Fingers lang / von reinem Silber / mit der Kittelkappen / Arßleder / Trog voll Ertz vff der Achsel / vnd sonsten gestalt wie ein Bergmann / welches die Natur in der Erden also artig formiret hat / daß es mit Verwunderung anzuschawen gewesen.
Vff einer andern Zeche / der Samson genant / hat man ein Crucifix funden / worauff der Leichnamb Christi / mit der dornen Cronen / außgestreckten Armen / vnd auffgenagelten Händen / biß vnten an den Leib / von feinem Silber formiret / als obs Menschen Hände gemacht hätten.
Es bestehet aber das Bergwerck selbigen Ortes in sehr schmalen Gängen / welche wie Zwirnsfäden durch das feste Gestein streichen / vnd wo sie zusammen kommen / sich veredlen / vnd einen stock Ertz machen / welches sehr reich am gehalt ist / daß vff etzlichen Zechen der Centner Ertz an die hundert Marck Silber gehalten. Vff etlichen Zechen ist rein gediegen Silber gebrochen / das man mit einem Hammer breit schlagen / vnd prägen mögen.
Man hat auch daselbst vor Alters / bey guter Auffnahm deß Bergwercks / vmb die Bergstatt Ackerbaw gehabt / so aber nunmehr gantz eingestellet. Noch vor dreyssig Jahren seynd bey die 500. Häuser allda gestanden / alle von Fichtenholtz gebawet / vnd formiret / wie in den nechstgelegenen Flecken / vff dem Lande Lauterberg vnd Hertzberg / welche sieder dem grossen Sterben / vnd bey eingerissenem Kriegsvnwesen / über die helffte abgangen / das Bergwerck auch gefallen / daß es wenig Nahrung gibt / vnd die Einwohner ihre Nahrung jetziger Zeit im Walde / vnd vff den Eisenhütten / mehrentheils aber vff dem Lande suchen müssen.
Das Wasser so die Einwohner gebrauchen / wird in einem Graben / der eine halbe Meil weges über der Bergstatt / nach Norden werts / im Walde sich anfähet / auß den nechsten Quellen vnd Bächlein zusammen / hernach durch einen Berg / der Sandhügel genant / vnd dann weiter in höltzern Röhren vff die Bergstatt geführet / vnd auff alle Gassen außgetheilet.
In dem vorgewesenen dreyssig Jährigen schrecklichen Teutschen Kriege / ist diese Bergstatt / mittels deß lieben Gottes / vnd der hohen Landesfürstlichen Obrigkeit Schutzes / vor aller gefährlichen vnd schädlichen Einquartierung / Außplünderung vnd Vberfall befreyet vnd verschonet blieben / da doch starcke Partheyen / zu etlichen hundert Pferden / mitten vnd oben durch die Bergstatt marchiret / vnd draussen auff den Wiesen ihr Nachtquartier nehmen müssen / auch vnterschiedliche Anschläge / die Bergstatt zu überfallen / von den kriegenden Völckern gemacht worden.
Matthäus Merian: Topographia Braunschweig Lüneburg. Frankfurter Kunstverein, Frankfurt am Mayn 1654/1658, Seite 44. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Braunschweig_L%C3%BCneburg_(Merian)_057.jpg&oldid=- (Version vom 31.7.2018)
_057.jpg&oldid=-){kind=link}
_057.jpg&oldid=3223341){kind=link}