herrlichen Gemächern / derer man sich bey den Fürstl. Ablagern lustig vnd nutzlich gebrauchen können / zieren lassen.
Anno 1626. ist benantes Ampthauß / ober vnd vntern Vorwerck / nebst allen darin gelegenen Dörffern / vnd einem Gotteshause in Harlingeroda / Messings-Drathütten / Kupfferhammer / Holtzhofe / vnd Saltzwerck / durch den Keyserlichen in Osterwick gelegenen Obristen Leutenant / Oßwald von Bodenteich / auff geheiß deß Herrn General Tylli verbrant / vnd jämmerlich eingeäschert worden / die Vrsache will man den domahligen halßstarrigen Bawren vnd Hartzschützen / welche auff freyer Strasse / absonderlich an den Hartzwegen nacher Goßlar / mit niederwerffung vnd todtschlagung / so wol der Keyserlichen Soldaten / als auch sonsten andern ehrlichen reisenden Leuten / beymessen / vnterdessen ist diesem Ampte darauff ein so grosser Schade zugefüget worden.
Dieses Ampthauß ist von Hertzogen Friederichen Vlrichen hochseligen Angedenckens / wieder auffzubawen zwar / aber sehr schlecht / angefangen / vnd nur vnter das Dach gebracht worden.
Nach dem aber der Durchleuchtiger / Hochgeborner Fürst vnd Herr / Herr Augustus, Hertzog zu Braunschweig vnd Lüneburg / die Regierung / nach Ableibung hochgedachten Hertzogen Friederichen Vlrichs / angetretten / haben S. Fürstl. Gn. selbiges hinwiederumb / nebst beyden Vorwercken / mit Gebäwden stattlich versehen lassen / daß auch Winters über die Fürstl. Stutarey insgesampt allhie auff dem Ampt besserer Wartung halber / verbleiben können / ist auch das Ampthauß mit schönen Gemächern / nit ohne sonderbare Kostung / gezieret vnd außgebawet worden. Worbey auch dieses zu mercken / daß vielgenantes altes Hauß Hartzburg für sich / weil es anfangs mit dem Außschuß der hiesigen Vnterthanen / hernachmals aber bey hochgedacht Sr. Früstl. Gn. mit Officirern vnd Soldaten absonderlich besetzet gewesen / vnd beede kriegende Partheyen sich daran nicht gemacht / allemahl frey vnd vnattaquiret / biß auff den erfolgten allgemeinen Frieden / verblieben.
Anno 1650. vnd 1651. ist auff Befehl jetzt hochgedachten Hertzogen Augusti zu Braunschweig vnd Lüneburg / Fürstl. Gn. die Alte Hartzburg / nebst dem Brunnen / so mit Steinen zugeworffen vnd erfüllet / wie sie damahlig sich im Stande befunden / gäntzlich herunter gerissen / die grossen festen Mauren mit grosser Mühe vmbgeschraubet / vnd so gut als man hat können / der Erden gleich gemachet worden / also / daß das Ampthauß fast nicht mehr Hartzburg / besondern Buntheim / woselbst das newe Ampthauß gelegen / nunmehr genant wird.
Zu welcher Zeit / vnd in welchem Jahr eigentlich diese Oberhartzische Bergwerck erfunden / davon hat man keine gewisse Nachricht / es wird aber davor gehalten / es sey dieses Bergwerck vnter der Regierung Keysers Heinrichen deß Andern / der Heilige genant / als der Rammelsbergische Bergbaw in gewaltiger flor gewesen / vnd die Bergleute an dem Orte sich so sehr gemehret / daß sie alle nicht Arbeit haben können / auffkommen / da dann die Begierde zu dem Bergbaw sie veranlasset / daß sie sich weiter in das obere Gebürge gemachet / hin vnd wieder im Hartz geschürffet / vnd Gänge außgerichtet / gestalt / wo in Berg vnd Thalen im gantzen Hartze nur Ertzgänge vermuhtet seyn / erweisen die Pingen vnd Hallen / daß der Alte Mann sich eingelegt gehabt.
Petrus Albinus gedencket in seiner Meißnischen BergChronica / das Wildemannische Bergwerck sey vmb das Jahr Christi 1045. vnd das Zellerfeldische hernach 1070. auffkommen vnd fündig worden.
Matthäus Merian: Topographia Braunschweig Lüneburg. Frankfurter Kunstverein, Frankfurt am Mayn 1654/1658, Seite 106. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Braunschweig_L%C3%BCneburg_(Merian)_160.jpg&oldid=- (Version vom 31.7.2018)
_160.jpg&oldid=-){kind=link}
_160.jpg&oldid=3223444){kind=link}