von denen Fürstl. Dienern vff solchem Damme für der Vestung ein oder ander Wohnhauß gebawet / damit dieselbe ohnfern von der Vestung ihr Haußwesen anstellen konten; Welches immer mehr vnd mehr also zugenommen / daß bey Zeiten Hertzogen Heinrichen deß Jüngern / (welcher in anno 1514. nach Ableiben seines Herrn Vattern / die Regierung angetretten) nicht alleine solche vff dem Damb erbawete Häuser in die Vestung mit beschlossen / sondern auch für dem Damb allerhand von Adel vnd Bürgers Standes Personen / jedoch ohn alle Ordnung / zu bawen angefangen / biß endlich eine sonderliche Commun für dem Damm vnd Vestung geworden / vnd dieselbe von Hertzog Heinrich dem Jüngern die Newstatt genennet worden / mit Bürgermeister vnd Raht besetzet / vnd so wol in gemein / als einem vnd andern insonderheit Fürstliche Gunst vnd Freyheiten ertheilet / vnd endlich auch im Jahr 1567. drey / oder nach Gelegenheit / vier Gerichte / über die Bürger vnd derer Sachen civiliter zu cognosciren / wie nicht weniger dieselbe mit Straff vnd Geldbussen / ausserhalb deß jenigen / was zu der hohen Obrigkeit vnd Burgfrieden gehörig / zu belegen / concediret vnd verstattet worden.
Nach Absterben Hertzogen Heinrichen deß Jüngern / in anno 1568. vnd bey antrettender Regierung Hertzogen Julii zu Braunschweig vnd Lüneburg / hochseel. Andenckens / haben Hertzogen Julii Fürstl. Gn. solche von dero Herrn Vatter höchstlöblichen Andenckens / angerichtete Newstatt in honorem parentis die Heinrichstatt nennen lassen / auch die zuvor bey seines Herrn Vattern Regierung vnordentlich gebawete Häuser zu einer weiten vnd Höhe / auch zu räumigen schnurrichtigen Strassen einzurichten / vnd derogestalt zu aptiren anbefohlen / daß alle Strassen vff die Vestung Wolffenbüttel lauffen musten. Ferners auch dieselbe in anno 1570. mit allerhand sonderlichen Statt-Befreyungen / Jahr- vnd Wochenmarckten / Handwercksgilden vnd Gewonheiten / Bier zu brawen / vnd Brodt zu backen / Wein- vnd Bierkeller / Apotheken / Brodt- vnd Fleischscharren zu haben / vnd andern mehr Freyheiten / sampt einem RahtsWapen / benantlich ein weiß springendes vnangefesseltes Roß / das sich von vorwerts mit allen vieren in die höhe zeigt / mit einem schwartzen Zaum / Sattel vnd Hinterzeug / in einem blawen Schild / vnd einer rohten Seul / mit einer gelben Cron / ein weisser Stern / deßgleichen auch zu beyden seiten deß Schildes zwey Engel / zur Rechten in roht vnd gelben / zur Lincken aber schwartz vnd weissen Kleidern / vnd mit Lorberkräntzen vff den Häupten / Fürstlich begnadet vnd angesehen; welche Privilegia, Freyheiten vnd Gewohnheiten auch von der Röm. Keyserl. Mayest. Rudolpho dem Andern dieses Nahmens / sub dato Wien / den 15. Tag Monats Julij / 1578. allergnädigst confirmiret vnd bestättiget worden.
Nachgehends ist in anno 1579. 80. 81. ohnfern von solcher Heinrich-Statt / ein Ort zur Handelstatt vnd Niederlage angerichtet / vnd derselbe zum Gotteslager genennet worden. Endlich auch in anno 1584. 85. 86. zwischen der Heinrich-Statt / (so von etzlichen auch die newe Heinrich-Statt geheissen) an derer seits deß Ockerstroms / vnd Gotteslager / abermahlen die Heinrich-Statt erweitert / vnd solcher erweiterter Ort die Julius-Friedenstätt genennet; Vnd ob wol bey erst antrettender Regierung Hertzogen Heinrich Julii, in anno 1589. anfangs solcher Ort gleichfalls Julius-Friedenstätt genennet; So ist dennoch aber kurtz hernach die Heinrich-Statt / vnd Julius-Friedenstätt in eines von Hertzogen Heinrich Julio die Heinrich-Statt genennet / vnd derselben am Tage Pauli Bekehrung 1602. verschiedene sonderliche statuta, vnd nützliche Ordnungen gegeben / auch ein Fürstl. Schultheiß / Burgermeister vnd Raht vorgesetzet worden.
Der Ockerstrom wird an verschiedenen Orten durch die Statt geleittet / also / daß vom Hartze herunter biß in die Statt
Matthäus Merian: Topographia Braunschweig Lüneburg. Frankfurter Kunstverein, Frankfurt am Mayn 1654/1658, Seite 209. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Braunschweig_L%C3%BCneburg_(Merian)_337.jpg&oldid=- (Version vom 31.7.2018)
_337.jpg&oldid=-){kind=link}
_337.jpg&oldid=3223621){kind=link}